ក្រុម Real Madrid ចាប់ផ្ដើមមានទឹកមាត់លេបវិញហើយ ក្រោយពីយកឈ្នះលើក្រុម Real Valladolid ក្នុងលទ្ធផល ១-០ ស្របពេលក្រុមកំពូលតារាង AT Madrid វិញបែរជាបរាជ័យសប្ដាហ៍នេះ។
១គ្រាប់របស់ក្រុមលោក Zidane ធ្វើបានសម្រេចដោយខ្សែបម្រើ Casemiro នៅនាទី៦៥ ក្រោយពីរូបគេខកខានឱកាសល្អៗជាច្រើន។ ក្រុម Real Madrid ត្បិតតែមានបញ្ហាកីឡាកររបួសច្រើនមែន ប៉ុន្តែពួកគេនៅតែអាចរក្សាសំណាញ់ទីបានរហូតដល់ចប់ការប្រកួត យក៣ពិន្ទុទៅផ្ទះវិញ។ ការបាន៣ពិន្ទុបន្ថែមទៀតនេះដែរក៏បានធ្វើឱ្យក្រុមអធិរាជស កាន់តែកៀកជាមួយក្រុមកំពូលតារាង AT Madrid ផងដែរ។
នៅយប់មិញនេះ AT Madrid បានចាញ់ Levante ២-០។ ដូច្នេះពួកគេបាត់៣ពិន្ទុទៅហើយ។ ពេលនេះ AT Madrid នៅឈរកំពូលតារាងមាន៥៥ពិន្ទុ ឆ្លងកាត់២៣ប្រកួត ស្របពេល Real Madrid វិញ មាន៥២ពិន្ទុ ឆ្លងកាត់២៤ប្រកួត៕
ប្រភព៖ BBC