មានប្រិយមិត្តជាច្រើនបានចោទជាសំណួរថា ហេតុអ្វីការលេងរបស់ Tottenham Hotspur យប់មិញ បែរជាអវត្តមាន Harry Kane ហើយដាក់ Son Heung-min នៅតំណែងប្រយុទ្ធកណ្តាលជំនួស?
ជាក់ស្តែងទៅតាមការបកស្រាយក្រោយចប់ការប្រកួតពីសំណាក់អ្នកចាត់ការលោក Jose Mourinho បាននិយាយថា Kane គេដឹងស្ថានភាពរបួសរបស់គេ ហើយគេសម្រេចចិត្តខ្លួនឯងទេក្នុងការមិនចូលរួម។
បញ្ជាក់ថា Kane បានរងរបួសនៅការប្រកួតទល់ Liverpool កាលពីខែមុន ហើយដោយសារបារម្ភខ្លាចរបួសនោះរើមកវិញ ទើបទុកជើងត្រៀមខ្លួនឲ្យបានរួចរាល់សម្រាប់ការប្រកួតចុងសប្តាហ៍ទល់ West Ham។
លោក Mourinho និយាយ៖ “Harry បានសម្រេចចិត្តទៅតាមអារម្មណ៍របស់គេ ដែលគិតថាការលេងនេះ [នៅ Europa League] គឺជាហានិភ័យក្រោយពីគេទើបតែជាពីរបួស ដោយខ្ញុំនិងក្រុមគ្រូពេទ្យក៏យល់ព្រមជាមួយគេ ហើយផ្តល់ឱកាសឲ្យគេមើលថែខ្លួនសិនទៅ”។
លោកបន្ថែមថា៖ “គេដឹងថាខ្ញុំចង់បានគេឲ្យលេងគ្រប់នាទីនៃការប្រកួតទាំងអស់ ដោយខ្ញុំចង់មកទីនេះជាមួយក្រុមដ៏ល្អនិងកីឡាករដែលបោះបង់ឱកាសដើម្បីទទួលបានលទ្ធផលល្អប្រសើរ ខ្ញុំជឿថាថ្ងៃអាទិត្យនេះគេត្រៀមខ្លួនរួចរាល់ហើយ”៕
ប្រភព៖ AF