កីឡាការនីបាល់ទះកូរ៉េខាងត្បូង ដែលជាកូនភ្លោះមានឈ្មោះ Lee Jae-yeong និង Lee Da-yeong ថ្មីៗនេះត្រូវបានក្លឹបនិងជម្រើសជាតិសម្រេចផ្អាកការងារ បន្ទាប់ពីរកឃើញថា ធ្លាប់មានរឿងអាស្រូវរំលោភបំពានធ្វើបាបមិត្តភ័ក្ដិកាលពីនៅថ្នាក់មធ្យមសិក្សាជាង ១០ ឆ្នាំមុន។
បងប្អូនភ្លោះពោរពេញដោយទេពកោសល្យក្នុងវិស័យកីឡាបាល់ទះ និងមានសម្រស់ស្រស់ស្អាតមិនចាញ់តារាសម្ដែង ទាំងពីររូបខាងលើ ជាកីឡាការនីបាល់ទះប្រកបអាជីពឲ្យក្លឹប Heungkuk Life Insurance Pink Spiders ដែលជាក្រុមកំពុងឈរលេខ ១ នៅលីគកំពូលរបស់កូរ៉េខាងត្បូង។ រីឯនៅជម្រើសជាតិតាមរយៈការប្រកួតវគ្គជម្រុះនៅតំបន់អាស៊ីកាលពីខែមករា ពួកនាងបានជួយឲ្យក្រុមមានកៅអីឡើងទៅការប្រកួតនៅកីឡាអូឡាំពិករដូវក្តៅក្នុងទីក្រុងតូក្យូ។
បង្វែរមករឿងហេតុគឺកើតឡើងត្រង់ថា មានអតីតមិត្តរួមថ្នាក់មធ្យមសិក្សារបស់នាងមួយរូប បានបង្ហោះសារចោទប្រកាន់ទៅលើកីឡាការនីវ័យ ២៤ ឆ្នាំទាំងពីររូបខាងលើ ពាក់ព័ន្ធនឹងអំពើរំលោភបំពានដល់ទៅ ២១ ករណី ដែលរួមមានទាំងការប្រើប្រាស់អំពើហិង្សា ការលួចលុយ និង ការគំរាមកំហែងដោយប្រើប្រាស់កាំបិតជាដើម ហើយយ៉ាងហោចណាស់មានជនរងគ្រោះ ៤ រូបផ្សេងទៀត ដែលទទួលរងនូវទង្វើដ៏អាក្រក់ស្រដៀងគ្នានេះពីអ្នកទាំងពីរ។
ក្រោយផ្ទុះសារចែកចាយនៅលើប្រព័ន្ធអ៊ីនធឺណិតមួយនោះហើយ ទាំង Jae-yeong និង Da-yeong ក៏បានប្រញាប់សារភាពទោសកំហុសទាំងអស់ ថាខ្លួនបានប្រព្រឹត្តិពិតមែនហើយធ្វើការអភ័យទោសតាមរយៈបណ្ដាញសង្គម Instagram។
ទោះជាយ៉ាងណាក្លឹបអាណាព្យាបាលរបស់ពួកនាងគឺ Pink Spiders ពុំបានចាត់ទុកថាជាករណីអាចលើកលែងអ្វីនោះដែរ ហើយនៅថ្ងៃចន្ទ ទី ១៥ កុម្ភៈកន្លងទៅនេះ បានប្រកាសជាផ្លូវការជុំវិញការព្យួរឈ្មោះកីឡាការនីទាំងពីរដោយគ្មានពេលវេលាកំណត់ច្បាស់លាស់។ សេចក្ដីថ្លែងការណ៍របស់ក្លឹបបានបញ្ជាក់ថា៖ “យើងមានការសោកស្តាយនិងសូមចូលរួមទទួលខុសត្រូវ លើរឿងខកចិត្តមួយនេះសម្រាប់អ្នករាល់គ្នាដែលស្រលាញ់វិស័យកីឡាបាល់ទះ រីឯការប្រើប្រាស់អំពើហិង្សានៅសាលា គឺជាទង្វើដែលមិនគួរកើតឡើង ហើយវាមិនអាចអត់ឱនបានដោយហេតុផលណាមួយឡើយ”។
លុះប៉ុន្មានម៉ោងក្រោយមកនៃការចេញសេចក្ដីថ្លែងការណ៍ពីក្លឹប ក៏ស្រាប់តែក្រុមជម្រើសជាតិកូរ៉េខាងត្បូងបានសម្រេចដកឈ្មោះរបស់អ្នកទាំងពីរចេញថែមទៀត ហើយក៏មិនបញ្ជាក់ពីពេលវេលានៃការព្យួរឈ្មោះច្បាស់លាស់នោះដែរ។ នេះបើតាមសារព័ត៌មាន Yonhap បានចុះផ្សាយ។
បញ្ជាក់ថា Jae-yeong ដែលលេងនៅតំណែង ស្មាត់ក្រៅប្រអប់ និង Da-yeong ជា អ្នកលើកបាល់ ធ្លាប់ជាសមាជិកនៅក្រុមបាល់ទះផ្នែកនារី ដែលជួយឲ្យកូរ៉េខាងត្បូងឈ្នះមេដាយមាសនៅព្រឹត្តិការណ៍កីឡាអាស៊ីកាលពីឆ្នាំ ២០១៤។ ដោយឡែកសម្រាប់ពាក់កណ្តាលឆ្នាំនេះ តាមថានាងក៏ត្រូវមានភារកិច្ចជួយក្រុមកូរ៉េខាងត្បូង ដែលស្ថិតក្នុងពូល A នៅព្រឹត្តិការណ៍កីឡាអូឡាំពិកឆ្នាំ ២០២០ តែចុងក្រោយបែរជាមកជួបរឿងបែបនេះ ពោលវាជាការខកខានឱកាសដ៏គួរឲ្យសោកស្តាយមួយ៕