បាល់ទាត់៖ កីឡដ្ឋានខេត្តកំពង់ស្ពឺដែលជាគំនិតផ្ដួចផ្ដើមរបស់ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា និងតំណាងរាស្ដ្រប្រចាំមណ្ឌលខេត្តកំពង់ស្ពឺ នឹងធ្វើការបុកគ្រឹះសាងសង់ជាផ្លូវការនាថ្ងៃទី២១ ខែកុម្ភៈ ឆ្នាំ២០២១ ចុងសប្ដាហ៍នេះ។ នេះបើតាមការបញ្ជាក់លើបណ្ដាញសង្គមផ្លូវការ របស់កីឡដ្ឋានដែលមានមូលដ្ឋាននៅក្រុងច្បារមននេះ។
កីឡដ្ឋានស្ដង់ដារអន្ដរជាតិនេះ នឹងសាងសង់លើផ្ទៃដីប្រមាណជាង ៤ហិតាស្ថិតនៅភូមិតាម៉ុល សង្កាត់ច្បារមន ក្រុងច្បារមន ខេត្តកំពង់ស្ពឺ ក្រោមការឧបត្ថម្ភរបស់គម្រោងណាហ្គាវើលដ៏បេះដូងសប្បុរស ដែលបានឧបត្ថម្ភថវិកា ២លានដុល្លារសម្រាប់ចំណាយលើការសាសងសង់ស្របតាមស្ដង់ដារ ទាំងទីលាន កន្លែងអង្គុយ ភ្លើងបំភ្លឺបម្រើឲ្យការប្រកួតពេលយប់ និងហេដ្ឋារចនាសម្ព័ន្ធមួយចំនួនទៀត។
គម្រោងសាងសង់កីឡដ្ឋានដ៏ធំនេះ នឹងក្លាយជាផ្នែកមួយដើម្បីរួមចំណែកអភិវឌ្ឍ វិស័យកីឡាបាល់ទាត់កម្ពុជាឲ្យរីកចម្រើន ក្នុងន័យចូលរួមផែនការអភិវឌ្ឍធនធានមនុស្ស ពិសេសធនធានកីឡាករដើម្បីត្រៀមឆ្ពោះទៅរក ការប្រកួតកីឡាស៊ីហ្គេមលើកទី៣២ នាឆ្នាំ២០២៣។
ការសាងសង់នេះផ្ដើមចេញពីស្មារតីរួមគ្នា ដោយមានការគាំទ្រពីដៃគូសហការ ដើម្បីជំរុញការអភិវឌ្ឍ និងលើកមុខមាត់ខេត្តតាមរយៈវិស័យកីឡា ពិសេសកីឡដ្ឋាននេះមិនមែនជារបស់បុគ្គលិក ឬក្រុមហ៊ុនណាឡើយគឺជារបស់ប្រជាពលរដ្ឋខេត្តកំពង់ស្ពឺងទាំងមូល។ គួរបញ្ជាក់ថា មុនឈានដល់ការរៀបចំពិធីបុកគ្រឹះ សាងសង់ជាផ្លូវការកាលពីឆ្នាំ២០២០ កន្លងទៅ ក្រុមការងារសាងសង់កីឡដ្ឋានខេត្តកំពង់ស្ពឺ ក៏បានបើកការដ្ឋានសាងសង់ក្លោងទ្វាចូលកីឡដ្ឋាន ដែលមកទល់បច្ចុប្បន្នសម្រេចសមិទ្ធផលបានប្រមាណ ៥០% ផងដែរ៕
ប្រភព៖BTV News