ក្រុមបាល់ទាត់ Cambodian Fan Club All Stars ឬហៅកាត់ CFA បានបង្កើតកម្មវិធីសប្បុរសមួយ ដែលនឹងធ្វើឡើងនៅចុងសប្ដាហ៍នេះ ដោយមានការចូលរួមពីក្រុមបាល់ទាត់ចំនួន ៤ ផ្សេងទៀត មានដូចជា Koh Kong All Stars, Pitou FC, Royal Mayura និង ស៊ុបពពែពេញចិត្ត ក៏ដូចជាវត្តមានសិល្បករល្បីៗជាច្រើនរូប។
កម្មវិធីនេះធ្វើឡើងក្នុងគោលបំណងរួមគ្នារៃអង្គាសថវិកាដើម្បីជួយដល់បងស្រី ជុន សូរ៉ា ដែលមានជំងឺរ៉ាំរ៉ៃ ហើយគ្មានលទ្ធភាពព្យាបាល និងកំពុងដង្ហោយស្វែងរកជំនួយពីសប្បុរសជននានា។
ការប្រកួតនឹងធ្វើឡើងនៅថ្ងៃសោរ៍ ទី ២០ កុម្ភៈ ឆ្នាំ ២០២១ នៅឯតារាង AIA Stadium ចាប់ពីវេលាម៉ោង ០៧:០០ នាទីព្រឹកតទៅ។ អ្នកគាំទ្រក៏ដូចជាសប្បុរសជនទាំងអស់អាចចូលរួមទស្សនាបានដោយសេរី ឬទស្សនាតាមរយៈការផ្សាយផ្ទាល់នៅលើទំព័រ VEHA Media។ កម្មវិធីសារនេះខុសពីសព្វមួយដង ដោយក្រៅពីការប្រកួតបាល់ទាត់ អ្នកគាំទ្រក៏មានឱកាសបានជួបនិងទទួលបានការកម្សាន្តអារម្មណ៍ជាមួយការប្រគំតន្ត្រីពីសំណាក់សិល្បករជាច្រើន មានដូចជាក្រុមតន្រ្តី Suffer Band, ម្ចាស់បទ “អារម្មណ៍សល់” ដា ភ្លេង និង ម្ចាស់បទ “ព្រងើយ” គឺ លោក នូ ឧសភា ជាដើម។
គួរបញ្ជាក់ថា នេះជាលើកទី ៤ ហើយសម្រាប់ក្រុមបាល់ទាត់ CFA ក្នុងការផ្តួចផ្តើមបង្កើតកម្មវិធីសប្បុរសធម៌ជួយដល់ជនខ្វះខាត។ ជាចុងក្រោយសម្រាប់ប្រិយមិត្តដែលចង់ចូលរួមជាថវិកាគាំទ្រដល់កម្មវិធីខាងលើ អ្នកអាចបរិច្ចាគបានតាមរយៈគណនី ABA ដែលមានលេខ 001 061 334 ឬគណនី ACLEDA ដែលមានលេខ 096 225 0588 ហើយឈ្មោះរបស់លោក Aiy Somoun ជាសម្គាល់៕