ក្រុម West Ham របស់លោក David Moyes នឹងត្រូវប៉ះជាមួយក្រុម Sheffield United នៅម៉ោង១រំលងអាធ្រាត្រនេះ សម្រាប់ការប្រកួតពានរង្វាន់ English Premier League ។
នេះជាប្រកួតសំខាន់មួយសម្រាប់ក្រុម West Ham ព្រោះបើពួកគេឈ្នះប្រកួតនេះ នឹងមានឱកាសបានចូលទៅ Top4 ជំនួសតំណែងរបស់ក្រុម Liverpool ឬនៅលើក្រុមរបស់លោក Klopp ហើយ។ តែសម្រាប់ការប៉ះក្រុមបាតតារាងនេះ លោក Moyes បានអះអាងថានឹងមិនមែនជាប្រកួតងាយស្រួលឡើយ ព្រោះក្រុមដែលនៅបាតតែងតែប្រឹងប្រែងលេងអស់ពីសមត្ថភាពប្រយុទ្ធដល់នាទីចុងក្រោយជានិច្ច។
អតីតអ្នកចាត់ការក្រុម Manchester United ខាងលើនេះបាននិយាយថា៖ “ពួកគេជាក្រុមដែលការពារល្អ និងមិនងាយរបូតគ្រាប់បាល់ច្រើនគ្រាប់ទេ។ ពួកគេតែងតែផ្ដល់ការលំបាកដល់ក្រុមដទៃជានិច្ច បើទោះជាពួកគេនៅបាតតារាងក៏ដោយ។ ពួកគេប្រឹងប្រែងខ្លាំងជានិច្ចដើម្បីបានឡើងមកលើវិញ ព្រោះបើពួកគេចាញ់ការប្រកួត១ នឹងធ្វើឱ្យពួកគេកាន់តែលំបាកមួយកម្រិតទៀតដែរ”៕ប្រភព Dailymail
