ខ្សែបម្រើ Miralem Pjanic បានបង្ហាញអារម្មណ៍អន់ចិត្តជាសាធារណៈតែម្ដង ចំពោះការមិនសូវបានឱកាសចូលលេងនៅក្រុម FC Barcelona តាំងពីផ្លាស់មកពីក្រុម Juventus ។
កីឡាករជម្រើសជាតិបូស្នីខាងលើនេះ បានផ្លាស់ពីក្រុម Juventus មកក្នុងតម្លៃផ្ទេរ៥២លានផោន ដោយកាលនោះមានការដោះដូរគ្នាជាមួយ Arthur ថែមទៀត។ តាំងពីរដូវក្ដៅមក ខ្សែបម្រើរូបនេះបានលេងជម្រើសដំបូងតែ៥ប្រកួតប៉ុណ្ណោះ ដែលការលេងបានតិចនេះធ្វើឱ្យសាមីខ្លួនមិនអស់ចិត្តឡើយ ព្រោះរូបគេមិនដែលគិតទេថាបានលេងតិចបែបនេះ។
Miralem Pjanic បានបង្ហាញអារម្មណ៍ក្នុងចិត្តថា៖ “ខ្ញុំបានឱកាសលេងគ្រប់ក្លឹបដែលខ្ញុំទៅ និងអ្នកចាត់ការទាំងអស់ដែលខ្ញុំធ្លាប់ជួប។ ស្ថានការណ៍បច្ចុប្បន្ននេះ គឺមិនដែលកើតឡើងទេសម្រាប់ខ្ញុំ។ មែនទែន វាពិតជាមិនមែនជារឿងងាយស្រួលទេ ខ្ញុំទទួលយកវាដោយពិបាកបំផុត។ ខ្ញុំមិនទាន់ទទួលបានហេតុផលពិតប្រាកដទេថាហេតុអ្វីខ្ញុំមិនសូវបាននាទីលេងបែបនេះ”៕ប្រភព Dailymail