នៅការប្រកួតជុំទី ២៣ សម្រាប់ Real Madrid ពួកគេធ្វើបានយ៉ាងល្អតាមរយៈជ័យជម្នះ យកឈ្នះទៅលើ Valencia ដោយលទ្ធផល ២-០ កាលពីយប់មិញ។ ធៀបនឹង Barcelona ដែលជាក្រុមលេខ ៣ ឆ្លងកាត់ ២២ ជុំ គឺ Real បាននាំមុខ ៣ ពិន្ទុបណ្តោះអាសន្ន ហើយនៅចាញ់ ៥ ពិន្ទុធៀបនឹងក្រុមកំពូលតារាង At Madrid [សល់ ២ ជុំក្នុងដៃ]។
យើងទៅមើលស្ថិតិការប្រកួតកាលពីយប់មិញ ឃើញថា Real គ្របក្រុមភ្ញៀវមួយចាស់ដៃ តាមរយៈការគ្រប់គ្រងបាល់ ៦១ ភាគរយ និងអត្រាបញ្ជូនបាល់ជោគជ័យមានដល់ ៩១ ភាគរយ។ ការស៊ុតចេញពីជើងធ្វើបាន ១៦ លើក ចំគោលដៅ ៧ លើក ដែលស្ថិតិនេះយកឈ្នះដាច់ធៀបនឹង Valencia ស៊ុតចំគោលដៅ ១ លើកគត់ ក្នុងចំណោមការស៊ុតទាំង ៤ លើកសរុប។
នៅនាទីទី ១២ គ្រាប់បាល់បើកឆាកក៏បានកើតឡើង តាមរយៈការស៊ុតបាល់ក្រៅប្រអប់ផុតដៃអ្នកចាំទីពីថ្វីជើងរបស់ Karim Benzema ហើយនៅនាទី ៤២ មុនបញ្ចប់តង់ទី ១ ខ្សែបម្រើ Toni Kroos កាប់បាល់រាបក្បែរប្រអប់គ្រោះថ្នាក់មួយជើងបន្ថែមទៀត និងរក្សាលទ្ធផល ២-០ ដល់បញ្ចប់ការប្រកួត។ នៅនាទី ៦០ Real ប៊ិះនឹងយកបានគ្រាប់បាល់ទី ៣ តាមរយៈការកឹបបាច់ដាច់ចង្កេះពី Ferland Mendy តែក្រោយឆែក VAR មើលឃើញថាបាល់នោះជាបាល់ Offside។
ទស្សនាវីដេអូខាងក្រោម៖
https://www.youtube.com/watch?v=n3gvmIa41uY