ការប្រកួតរវាង Barcelona និង PSG នឹងប្រព្រឹត្តិទៅនៅឯកីឡដ្ឋាន Camp Nou នាវេលាម៉ោង ០៣:០០ នាទីព្រឹក ឈានចូលថ្ងៃពុធទី ១៧ កុម្ភៈ ហើយក៏មានផ្សាយផ្ទាល់នៅលើទំព័រ CTS Sports។
សម្រាប់ការប្រកួតដ៏កក្រើកនេះ រវាងក្រុមទាំងពីរក៏បានដឹងពីសមាសភាពកីឡាករសំខាន់មួយចំនួនជាបណ្តើរៗហើយដែរថាតើនរណាអាចអវត្តមាន និងអាចចូលលេងដោយពេញជើង ១០០ ភាគរយ?
ជាក់ស្តែងសម្រាប់ Barcelona ដែលខកខានការមកចូលរួមរបស់ Gerard Pique ដោយសារបញ្ហារបួសរយៈពេលច្រើនសប្តាហ៍មកនេះ ទីបំផុតគេបានត្រលប់មកហ្វឹកហាត់ជាមួយមិត្តរួមក្រុមវិញហើយនៅថ្ងៃអាទិត្យ។ នេះបើតាមសារព័ត៌មាន La Vanguardia បានចុះផ្សាយ។
ជាងនេះបើតាមការបញ្ជាក់ពីប្រភព Marca មួយទៀតឯណោះវិញ ក៏ចុះផ្សាយស្រដៀងគ្នាថាខ្សែការពារសញ្ជាតិអេស្ប៉ាញគេបានដំណើរការការហ្វឹកហាត់យ៉ាងល្អ ដោយសភាពនៃរបួសជង្គង់ទំនងជាត្រលប់មកដូចដើមវិញហើយ និងអាចត្រៀមខ្លួនសម្រាប់ការប្រកួតទល់ PSG នៅជើងទី ១ នេះបាន៕
ប្រភព៖ BeSoccer