នៅយប់ថ្ងៃអាទិត្យនេះ ប្រធានគ្រប់គ្រងផ្នែកកីឡារបស់ក្លឹប Bayern Munich បានប្រកាសជាផ្លូវការហើយថា Dayot Upamecano នឹងមកចូលរួមនៅក្លឹបរបស់ខ្លួននៅរដូវក្តៅខាងមុខ ក្រោយពីសម្រេចការចរចាបានដោយជោគជ័យ។
ខ្សែការពារកំពុងឈរជើងនៅក្លឹបបច្ចុប្បន្ន RB Leipzig មានក្លឹបធំៗជាច្រើនតាមចង់បាន តែចុងក្រោយនៅតែមិនអាចប្រជែងឈ្នះ Bayern Munich។ តាមដឹងកីឡាករវ័យ ២២ ឆ្នាំ បានមានតម្លៃផ្ទេរចេញ ៤០ លានអឺរ៉ូ ដែលវាជាតម្លៃផ្តាច់កុងត្រាចេញពីក្លឹប Leipzig ផ្ទាល់តែម្តង។
ជាមួយក្លឹបថ្មី Upamecano ព្រមព្រៀងលើកុងត្រារយៈពេល ៥ ឆ្នាំ ពោលមានសុពលភាពដល់ខែកក្កដា ឆ្នាំ ២០២៦ ហើយគេនឹងមកបង្ហាញខ្លួននៅថ្ងៃទី ១ កក្កដា ឆ្នាំ ២០២១ នេះ។
តាមការបញ្ជាក់ពីលោក Hasan Salihamidzic ជាប្រធានផ្នែកកីឡារបស់ Bayern បានប្រាប់ថា៖ “យើងពិតជារីករាយដែលអាចចុះហត្ថលេខាយក Dayot Upamecano សម្រាប់ FC Bayern Munchen ដោយយើងជឿថា Dayot គេនឹងក្លាយជាសមាជិកដ៏សំខាន់របស់ក្រុមយើងនៅរយៈពេលប៉ុន្មានឆ្នាំបន្តបន្ទាប់”៕
ប្រភព៖ AF