រាល់បណ្តាក្មេងរើសបាល់លើទីលានទាំងអស់ ជឿថាប្រាកដជាមានក្តីស្រមៃដូចៗគ្នា នោះគឺទៅថ្ងៃខាងមុខពួកគេចង់ក្លាយជាកីឡាករបាល់ទាត់ ដែលអាចបង្កើតភាពជោគជ័យនិងទទួលបានការគាំទ្រទូទាំងសកលលោក។
ក្មេងខ្លះក៏បានសម្រេចក្តីស្រមៃរបស់ពួកគេជាបណ្តើរៗ ហើយខ្លះទៀតក៏កំពុងស្ថិតលើវិថីឆ្ពោះទៅកាន់ភាពជោគជ័យ ប្រសិនពួកគេបន្តការខិតខំប្រឹងប្រែង និងឈរលើឆន្ទៈដែលមិនបោះបង់។
តទៅនេះទំព័រ CTS Sports សូមធ្វើការបង្ហាញអតីតក្មេងរើសបាល់លើទីលាន ៧ រូប ដែលបច្ចុប្បន្នបានក្លាយជាកីឡាករបាល់ទាត់ ហើយសុទ្ធសឹងតែប្រកបអាជីពនៅក្លឹបកំពូល៖
៧) Trent Alexander-Arnold
ខ្សែការពារស្លាបស្តាំរបស់ Liverpool បានទម្លាយថាកាលពីឆ្នាំ ២០១៤ ខ្លួនក៏ធ្លាប់ជាអតីតក្មេងរើសបាល់មួយរូបនៅឯកីឡដ្ឋាន Anfield ផងដែរ ហើយកាលនោះគឺលេចមុខក្នុងការប្រកួតរវាង Chelsea និង Liverpool ដែលក្រុមរងបរាជ័យ ២-០។ Arnold បានមានឱកាសឡើងមកលេងនៅឈុតធំនាឆ្នាំ ២០១៦ ហើយសព្វថ្ងៃជាខ្សែការពារស្លាបស្តាំមានហាងឆេងថ្លៃខ្លួនខ្ពស់បំផុតដល់ទៅ ១១០ លានអឺរ៉ូ។
៦) Brahim Diaz
ខ្សែប្រយុទ្ធរបស់ក្លឹប Real Madrid និងកំពុងខ្ចីជើងឲ្យក្លឹប AC Milan រូបនេះ កាលពីឆ្នាំ ២០១២ ធ្លាប់ជាក្មេងរើសបាល់នៅក្លឹប Malaga ហើយមុខមាត់របស់គេត្រូវបានប្រទះឃើញនៅជាប់ Background នៃរូបភាពអបអររបស់ Isco និង Sannti Cazorla។ ឆ្លងផុតរយៈពេល ៧ ឆ្នាំមកនេះ គេបានមានឱកាសក្លាយជាកីឡាករនៅក្លឹប Real Madrid ដែលជាក្លឹបយក្សនៅតំបន់អឺរ៉ុប ហើយមិនមែនសុទ្ធតែកីឡាកររាល់គ្នាអាចមានឱកាសមកចូលរួមនោះឡើយ។
៥) Matthijs de Ligt
កីឡាករហូឡង់កាលពីអតីតកាល គេធ្លាប់ជាក្មេងរើសបាល់នៅក្លឹប Ajax ហើយរូបភាពរបស់គេនៅតែស្ថិតក្នុងការចងចាំ កំឡុងការថតពេលឈរក្បែរសិស្សច្បង Luis Suarez។ ឆ្លងកាត់រយៈពេលជិត ១០ ឆ្នាំ de Ligt គេបានផ្លាស់ប្តូរមុខមាត់ថ្មី ក្លាយជាខ្សែការពារមានតម្លៃផ្ទេរខ្ពស់បំផុតលំដាប់ទី ៤ ក្នុងលោក ក្រោយការចាកចេញពី Ajax មកចូលរួមនៅ Juventus ជាមួយតម្លៃ ៦៧,៥ លានផោន។
៤) Bernardo Silva
មុនពេលក្លាយជាកីឡាករឆ្នើមនៅក្លឹប Manchester City ខ្សែបម្រើសញ្ជាតិព័រទុយហ្គាល់ក៏ធ្លាប់ជាអតីតក្មេងរើសបាល់មួយរូបនៅក្លឹប Benfica ផងដែរ។ គេបានបញ្ចប់ថ្នាក់ហ្វឹកហាត់នៅថ្នាលយុវជន ជាមួយជំនាន់ Ederson និង Renato Sanches ហើយក៏មានការចុះផ្សាយថា នៅឆ្នាំ ២០០៨ Bernardo ធ្លាប់ជាក្មេងរើសបាល់ កំឡុងការប្រកួតរវាង Benfica និង Napoli នៅ Europa League។
៣) Callum Hudson-Odoi
នៅឆ្នាំ ២០១៤ កំឡុងការប្រកួតរវាង Chelsea និង Man Utd គ្រានោះកីឡាករ Samuel Eto’o បានរកគ្រាប់បាល់ Hat-Trick ហើយគេបានទៅអបអរជាមួយក្មេងរើសបាល់អាយុ ១៣ ឆ្នាំម្នាក់នៅក្បែរតំបន់អង្គុយរបស់អ្នកគាំទ្រ ហើយម្នាក់នោះគេគឺជា Callum Hudson-Odoi ដែលសព្វថ្ងៃជាកីឡាកររបស់ក្លឹបតោខៀវ Chelsea និងមានហាងឆេងថ្លៃខ្លួនប្រមាណ ៣៥ លានអឺរ៉ូ។
២) Donny van de Beek
Van de Beek ក៏ជាអតីតយុវជននៅ Ajax មួយរូបផងដែរ ហើយក្រោយឆ្លងផុតវគ្គហ្វឹកហាត់នៅថ្នាលយុវជនជោគជ័យ គេក៏មានឱកាសមកឈរជើងនៅលើទីលានរបស់កីឡាករឈុតធំ ប៉ុន្តែនាមជាក្មេងរើសបាល់មួយរូបតែប៉ុណ្ណោះ។ ពេលនោះហើយគេបានមានឱកាសជួប idol ក្នុងក្តីស្រមៃជាច្រើនរូប ជាពិសេសគឺ Luis Suarez ដែលគេបានមានឱកាសឈរក្បែរ និងថតរូបជាមួយដូចទៅនឹង De Ligt អ៊ីចឹងដែរ។
១) Phil Foden
នៅការប្រកួតរបស់ Manchester City ទល់នឹង Swansea កាលពីឆ្នាំ ២០១៤ កីឡាករ Steven Jovetic បានរកគ្រាប់បាល់ជ័យជម្នះ ហើយនៅផ្នែកខាងក្រោយនៃ Background អបអររបស់គេ គឺជួបមុខក្មេងប្រុសម្នាក់ ដែលនោះគឺជា Phil Foden។
Foden សព្វថ្ងៃជាយុវជនឆ្នើមនៅ Man City ដែលគេកំពុងសកម្មទាំងការរកគ្រាប់បាល់និង Assist។ នៅរដូវកាល ២០២០/២១ កីឡាករអង់គ្លេសរកបាន ១០ គ្រាប់និង Assist ៦ លើក ហើយមានជើងចាស់មួយរូប ហ៊ាននិយាយថា Foden សក្តិសមជាកីឡាករតម្លៃ ២០០ លានផោនថែមទៀតផង៕