កន្លងទៅនេះលោក Karl-Heinz Rummenigge បាននិយាយនៅបទសម្ភាសន៍មួយថា ខ្លួនចាប់អារម្មណ៍កីឡាករ Mohamed Salah ហើយចង់បានគេក្លាយជាកីឡាករក្នុងក្រុមទៅថ្ងៃអនាគត។
ពាក់ព័ន្ធនឹងបញ្ហានេះ ខាងក្លឹប Liverpool ក៏សង្កត់ធ្ងន់រួចហើយថាគ្មានគម្រោងលក់ Salah ចេញទេ ជាពិសេសគឺនៅបញ្ចប់រដូវកាល ២០២០/២១ ខាងមុខ។ នេះបើតាមសារព័ត៌មាន The Sun បានចុះផ្សាយ។
កុំថាឡើយក្នុងតម្លៃស្នើប៉ុណ្ណាក៏ដោយ ក៏ក្លឹបម្ចាស់ដី Anfield មិនចាប់អារម្មណ៍លើការលក់គេចេញដែរ។ ជាក់ស្តែងបុរសសញ្ជាតិអេហ្សីបសេសសល់សុពលភាពកុងត្រាជាមួយ Liverpool រយៈពេល ២ ឆ្នាំកន្លះទៀត ហើយទទួលបានថ្លៃពលកម្មប្រមាណ ២០០ ០០០ ផោន/សប្តាហ៍។
យ៉ាងណាមិញសម្រាប់អតីតខ្សែប្រយុទ្ធ Roma/Chelsea ខាងលើ ប្រសិនសម្រេចចិត្តការផ្ទេរទៅក្លឹបថ្មី នោះជឿថាគេប្រាកដជាបានថ្លៃពលកម្មក្រាស់ក្រែលជាងនេះមិនខាន ព្រោះកំពុងជាប់ឈ្មោះជាខ្សែប្រយុទ្ធកំពូលមួយរូបទៅហើយ ជាពិសេសក្រោយពេលប្រធានក្លឹប Bayern ឧទ្ទេសនាមឲ្យថាជា “Messi ប្រចាំតំបន់អាហ្វ្រិក” ទៀតនោះ៕
ប្រភព៖ Sportsmole