ការប្រកួតពានរង្វាន់ Copa del Rey កាលពីយប់មិញ យើងបានទទួលលទ្ធផលជាបណ្តើរៗហើយដោយ Sevilla បានយកឈ្នះទៅលើ Barcelona ២-០ សម្រាប់ជើងទី ១ វគ្គ ៤ ក្រុមចុងក្រោយ។
ឈុត ១១ រូបរបស់ Barcelona ដែលជាក្រុមភ្ញៀវរាងស្ទើរជួរក្រោមបន្តិច ព្រោះពុំមាន Gerard Pique ហើយជំនួសមកវិញនៅ O.Mingueza។ ទៅមើលឱកាសវាយសម្រុករវាងក្រុមទាំងពីរមានប្រហែលគ្នា ដោយ Sevilla ស៊ុត ១១ លើក ចំគោលដៅ ៣ លើក ធៀបនឹង Barcelona ស៊ុត ១៣ លើក ចំគោលដៅ ៤ លើក។
គ្រាប់បាល់បើកឆាកធ្វើបានដោយកីឡាករ Jules Kounde នៅនាទី ២៥ មុនការបន្ថែមគ្រាប់បាល់ទី ២ ដោយអតីតកីឡាកររបស់អ្នកមានបុណ្យនោះគឺ Ivan Rakitic ធ្វើបាននៅនាទី ៨៥ ហើយរក្សាលទ្ធផលដល់បញ្ចប់ការប្រកួត។
ទស្សនាវីដេអូខាងក្រោម៖
នៅយប់នេះ យើងនឹងរង់ចាំមើលលទ្ធផលរវាងក្រុម Athletic ទល់ Levante មួយផ្សេងទៀត មុនការប្រកួតជើងទី ២ ដែលជាវាវគ្គសម្រេចយកក្រុមឡើងទៅវគ្គផ្តាច់ព្រ័ត្រ ធ្វើឡើងនៅថ្ងៃទី ៥ មិនា៕