ក្លឹបតោខៀវ Chelsea ត្រូវបានគេរាយការណ៍ថាកំពុងចរចាជាមួយភាគីខ្សែការពារ David Alaba អំពីសំណើបន្ទាបតម្លៃពលកម្មឲ្យទាបជាង ៤០០ ០០០ ផោន/សប្តាហ៍ ដើម្បីឈានដល់ការសម្រេចចុះហត្ថលេខាជាផ្លូវការ។
បច្ចុប្បន្នកីឡាករអូទ្រីសសេសសល់សុពលភាពកុងត្រាដល់ចុងខែមិថុនា ឆ្នាំ ២០២១ ជាមួយក្លឹប Bayern Munich ហើយក៏មានក្លឹបធំៗជាច្រើនដែលចង់បានរូបគេនៅបញ្ចប់រដូវកាលក្នុងលក្ខខណ្ឌឥតតម្លៃខ្លួន រួមមាន Chelsea, Liverpool និង Real Madrid ជាដើម។
ប៉ុន្តែសម្រាប់ក្រុមរបស់លោក Thomas Tuchel ដោយសារសព្វថ្ងៃគិតចង់បន្តកុងត្រាឲ្យ Thiago Silva ដែលជាខ្សែការពារមួយរូបដូចគ្នា អ៊ីចឹងហើយទើបក្លឹបមិនអាចបន្ថែមខ្ទង់ចំណាយក្រាស់ក្រែលដល់ David Alaba ឡើយ លើកលែងតែគេព្រមទម្លាក់តម្លៃពលកម្ម។
បញ្ជាក់ថា Alaba បើទោះបីជាកៀកផុតកុងត្រាតែគេនៅបន្តជាកីឡាករដ៏សកម្មក្រោមការដឹកនាំរបស់លោ Hansi Flick ដដែល។ រដូវកាលនេះរកបាន ២ គ្រាប់ហើយនៅការបង្ហាញខ្លួន ២៦ ប្រកួត និងត្រៀមប្រជែងពានរង្វាន់ទី ៦ នៅរយៈពេល ១២ ខែចុងក្រោយគឺ FIFA Club World Cup ជាមួយក្រុមនៅចុងសប្តាហ៍ទៀតផង៕
ប្រភព៖ Sportsmole