Sergio Aguero បានខកខានការរកគ្រាប់បាល់នៅ Premier League រយៈពេលជាងមួយឆ្នាំមកហើយ បន្ទាប់ពីខកខានការបង្ហាញខ្លួនលើទីលានជាបន្តបន្ទាប់ ដោយសារបញ្ហារបួសនិងការឆ្លងជំងឺ COVID-19។
នៅថ្ងៃចន្ទកន្លងទៅនេះ Aguero បានត្រលប់មកហ្វឹកហាត់ជាមួយ City ដូចធម្មតាវិញហើយ ប៉ុន្តែរឿងរ៉ាវអនាគតមិនប្រាកដប្រជារបស់គេនៅតែមិនទាន់ដោះស្រាយចេញ ថានឹងសម្រេចបន្តឈរជើងនៅ City ហួសពីរដូវកាលនេះ ឬត្រូវចាកចេញទៅក្លឹបថ្មីណាមួយ។
ខ្សែប្រយុទ្ធសញ្ជាតិអាហ្សង់ទីនសេសសល់សុពលភាពកុងត្រាជាមួយ City ដល់ចុងខែមិថុនា ឆ្នាំ ២០២១ ហើយពាក់ព័ន្ធនឹងការបន្តកុងត្រាថ្មី ក៏មិនទាន់ចេញតម្រុយភ្លើងខៀវនោះដែរ។ ផ្សាភ្ជាប់នឹងរឿងរ៉ាវនេះ តាមរបាយការណ៍ The Athletic ចុះផ្សាយថា ថ្នាក់លើរបស់ក្លឹបកំពុងឈរលេខ ១ នៅ Premier League បានសម្លឹងអ្នកថ្មីទុករួចជាស្រេចហើយ នោះគឺអតីតខ្សែប្រយុទ្ធនៅ United កីឡាករ Romelu Lukaku។
ចាប់តាំងពីការផ្ទេរទៅចូលរួមនៅ Inter Milan ខ្សែប្រយុទ្ធសញ្ជាតិបែលហ្សិកបានបង្កើតភាពជោគជ័យជាខ្លាំង តាមរយៈការរកគ្រាប់បាល់ដល់ទៅ ៥៤ គ្រាប់នៅ ៧៨ ប្រកួត។ បើទោះបីកុងត្រារបស់គេជាមួយ Inter នៅសេសសល់ជាង ៣ ឆ្នាំកន្លះទៀតក្តី ប៉ុន្តែភាគរយចាកចេញក៏អាចកើតមាន ព្រោះល្ហិចល្ហៀងថាក្លឹបអ៊ីតាលីកំពុងជួបវិបត្តិហិរញ្ញវត្ថុក្នុងការចំណាយលើថ្លៃពលកម្មកីឡាករ។
ដោយឡែកសម្រាប់ Aguero ឯណោះវិញ ប្រសិនគេចាកចេញនៅលក្ខខណ្ឌឥតតម្លៃខ្លួន នោះប្រាកដជាមានក្លឹបជាច្រើនចាប់យកឱកាសដ៏ល្អនេះ ដោយតួយ៉ាងដូចជាក្លឹប Inter Miami របស់អាមេរិក និង Paris Saint-Germain នៅឯលីគកំពូលបារាំង៕
ប្រភព៖ Sportsmole