Pep Guardiola អ្នកចាត់ការក្រុម Manchester City និយាយសរសើរដល់ខ្សែប្រយុទ្ធ Sergio Aguero ខ្លាំងណាស់ ក្រោយពីរកបាន៣គ្រាប់ ជួយក្រុមឈ្នះ Huddersfield ៦-១។
ក្រុម Manchester City យប់មិញនេះ ធ្វើឱ្យអ្នកគាំទ្រសប្បាយចិត្តខ្លាំងមែនទែន ដោយយកឈ្នះលើក្រុមHuddersfield យ៉ាងចាស់ដៃតែម្ដង។ ៦គ្រាប់ដែលរកបានក្នុងប្រកួតនេះ ធ្វើបានសម្រេចដោយខ្សែប្រយុទ្ធ Sergio Aguero ៣គ្រាប់ម្នាក់ឯង និងក្លាយជាកីឡាកររកបាន Hat-trick មុនគេនៅរដូវកាលនេះផងដែរ។
ចំពោះការលេងល្អនៅយប់មិញនេះដែរ បានធ្វើឱ្យអ្នកចាត់ការ Pep និយាយថា៖ “រដូវកាលនេះ គាត់ត្រលប់មកវិញដោយទំនុកចិត្ត ខ្ញុំបានឃើញគាត់មានទំនុកចិត្តណាស់តាំងពីមកដល់ភ្លាម។ Sergio បច្ចុប្បន្ននេះ មានអារម្មណ៍ល្អ ខុសឆ្ងាយពីប៉ុន្មានឆ្នាំមុន គាត់អារម្មណ៍មិនមូលឡើយ។ គាត់ពិតជាល្អ ជាខ្សែប្រយុទ្ធល្អបំផុតនៅលើលោកនេះ”៕ប្រភព៖ dailymail
