ក្រុមឈ្នះជើងឯក UEFA Champions League រដូវកាល ២០១៩/២០ គឺ Bayern Munich នឹងត្រូវប្រកួតទល់ក្លឹប Al Ahly របស់ប្រទេសអេហ្សីប នៅយប់នេះវេលាម៉ោង ០១:០០ នាទី ឈានចូលថ្ងៃទី ៩ កុម្ភៈ។
ការប្រកួតនេះ នឹងមានផ្សាយផ្ទាល់នៅលើទំព័រ CTS Sports ហើយនឹងធ្វើការសម្រេចយកក្រុមដែលទទួលជ័យជម្នះ ឡើងទៅកាន់វគ្គផ្ដាច់ព្រ័ត្រពានរង្វាន់ FIFA Club World Cup ដែលមានក្រុមម៉ិកស៊ីកូ UANL កំពុងរង់ចាំ ត្រៀមតតាំងនៅថ្ងៃទី ១១ កុម្ភៈ។
បញ្ជាក់ថាសម្រាប់ពានរង្វាន់នេះដែរ ប្រសិនណា Bayern Munich ឈ្នះទៀតនោះ វានឹងក្លាយជាពានរង្វាន់ទី ៦ របស់ពួកគេនៅរយៈពេល ១២ ខែចុងក្រោយ។ កន្លងមក Bayern បានឈ្នះពាន Bundesliga, DFB-Pokal, DFL-Supercup, UEFA Champions League, UEFA Supercup និងចុងក្រោយអាចជាពានរង្វាន់ FIFA Club World Cup នេះផ្ទាល់តែម្តង។
ពន្យល់អំពីទម្រង់នៃការរៀបចំពានរង្វាន់ Club World Cup ឬហៅកាត់ CWC នេះបន្តិច ដោយពាននេះគឺបង្កើតឡើងដោយសហព័ន្ធបាល់ទាត់អន្តរជាតិ FIFA ដែលមានអាយុកាល ២១ ឆ្នាំមកហើយ។ ទម្រង់នៃការប្រកួត គឺ FIFA កំណត់យកក្រុមដែលឈ្នះពានរង្វាន់ប្រចាំតំបន់នៃទ្វីបនីមួយៗមកធ្វើការតតាំងគ្នា ដោយរួមមានក្រុមឈ្នះជើងឯកពានរង្វាន់ AFC Champions League នៅប៉ែកអាស៊ី CAF Champions League នៅប៉ែកអាហ្វ្រិក CONCACAF Champions League នៅប៉ែកអាមេរិកខាងជើង Copa Libertadores នៅប៉ែកអាមេរិកខាងត្បូង OFC Champions League នៅប៉ែកអូសេអានី និង UEFA Champions League នៅប៉ែកអឺរ៉ុប។ ក្រៅពីនេះក៏នឹងមានការបន្ថែមនៅក្រុមដែលឈ្នះជើងឯកប្រចាំប្រទេសដែលជាម្ចាស់ផ្ទះ ឲ្យមានកៅអីចូលរួមផងដែរ៕