ការប្រកួតនៅក្របខ័ណ្ឌ La Liga ហាក់កាន់តែជក់ចិត្តទៅ នៅប៉ុន្មានប្រកួតចុងក្រោយ ដែលក្រុមខ្លាំងពីរ Real Madrid និង Barcelona តាមប្រដេញពិន្ទុគ្នាឥតឈប់ និងឈរលើគោលដៅតែមួយគឺតាមប្រជែងក្រុមឈរកំពូលតារាង Atletico Madrid។
ជាក់ស្តែងដូចនៅការប្រកួតយប់មិញ អ្នកមានបុណ្យបានយកឈ្នះ ៣-២ ទៅលើ Real Betis ដែល ៣ ពិន្ទុដ៏មានន័យសម្រាប់ពួកគេ បានរុញឲ្យឈ្មោះក្រុមឡើងមកឈរនៅចំណាត់ថ្នាក់ទី ២ មាន ៤៣ ពិន្ទុ។
យើងទៅមើលស្ថិតិការប្រកួត ក្រុមភ្ញៀវដឹកនាំដោយលោក Ronald Koeman មានឱកាសគ្រប់គ្រងបាល់ ៦៤ ភាគរយ ស៊ុត ១២ លើក ចំគោលដៅ ៤ លើក រីឯក្រុមម្ចាស់ផ្ទះស៊ុត ៨ លើក ចំគោលដៅ ៥ លើក។
គ្រាប់បាល់ដំបូងធ្វើបានដោយកីឡាករ Borja Iglesias នៅនាទី ៣៨ មុនពេល Lionel Messi តាមស្មើនៅនាទី ៥៩ ហើយរហូតដល់នាទី ៦៨ ក៏កើតមានបាល់ Own Goal ចេញពី Victor Ruiz តែរំលង ៧ នាទីគេក៏នាំគ្រាប់បាល់ឲ្យក្រុមតាមស្មើវិញ។ គ្រាប់បាល់ជ័យជម្នះកើតឡើងនៅនាទី ៨៧ ដោយខ្សែប្រយុទ្ធ Francisco Trincao ជួយឲ្យក្រុមយកបាន ៣ ពិន្ទុដោយជោគជ័យ៕
ទស្សនាវីដេអូខាងក្រោម៖