ជាការពិត Cristiano Ronaldo គឺជាមនុស្សដែលពោរពេញដោយទំនុកចិត្តនិងសេចក្ដីប្ដេជ្ញាចិត្តខ្ពស់ ប៉ុន្តែជាមួយភាពជោគជ័យលើគំនរទ្រព្យខ្ទង់ពាន់លានដុល្លារដូចសព្វថ្ងៃ គឺលោកមិនហ៊ានសូម្បីតែស្រមៃកាលពីអតីតកាល។
ម្ចាស់ពាន Ballon d’Or ៥ សម័យកាល ទើបតែឈានចូលវ័យ ៣៦ ឆ្នាំ កាលពីថ្ងៃទី ៥ កុម្ភៈកន្លងទៅ ហើយមុនឈានមកដល់ចំណុចនេះ Ronaldo ធ្លាប់បានហែលកាត់នូវរឿងរ៉ាវលំបាកជាច្រើន សឹងតែពេលខ្លះប៊ិះអស់ឱកាសនឹងក្លាយជាកីឡាករបាល់ទាត់ទៀតផង។
បង្វែរទៅសម្រង់សម្តីដែលកីឡាករព័រទុយហ្គាល់ធ្លាប់បាននិយាយ នោះគឺកាលនៅក្មេងលោកគិតថាទៅថ្ងៃខាងមុខ ខ្លួនអាចត្រឹមតែក្លាយជា អ្នកនេសាទត្រីមួយរូប នៅលើកោះ Maedeira ប្រទេសព័រទុយហ្គាល់តែប៉ុណ្ណោះ ពោលមិនគិតថានឹងក្លាយជាកីឡាករបាល់ទាត់ដែលជោគជ័យដូចសព្វថ្ងៃនេះទេ។
ប្រាប់សារព័ត៌មាន Canal 11 អតីតខ្សែប្រយុទ្ធក្លឹប Real Madrid បានបង្ហើបថា៖ “ខ្ញុំធ្លាប់គិតថានឹងក្លាយជាអ្នកនេសាទត្រីនៅកោះ Madeira ពោលជីវិតដូចសព្វថ្ងៃពុំបានស្ថិតក្នុងការគ្រោងទុករបស់ខ្ញុំឡើយ ដោយជាការពិតខ្ញុំមានចិត្តចង់ក្លាយជាកីឡាករបាល់ទាត់អាជីព ប៉ុន្តែមិនបានគិតថានឹងជោគជ័យដូចអ្វីដែលបានសម្រេចកន្លងមកឡើយ”។
បញ្ជាក់ដែរថា CR7 សព្វថ្ងៃជាអត្តពលិកមួយរូបដែលមានទ្រព្យច្រើនជាង ១ ពាន់លានដុល្លារ ហើយកាលពីពេលថ្មីៗនេះ លោកទើបតែក្លាយជាកីឡាករដែលរកបានគ្រាប់បាល់ច្រើនបំផុតក្នុងប្រវត្តិសាស្ត្រ យកឈ្នះកំណត់ត្រាចាស់របស់លោក Josef Bican ថែមទៀតផង៕
ប្រភព៖ SportBible