កីឡាករម្នាក់ៗលើទីលាន រមែងមានស្ទាយអបអរក្រោយពេលស៊ុតបញ្ចូលទីខុសៗពីគ្នា ហើយសម្រាប់កីឡាករអាស៊ី Son Heung-min ឯណេះវិញ ភាគច្រើនគេប្រទះឃើញធ្វើដៃចេញជាទម្រង់រាងកាមេរ៉ាដូចជាកំពុងផ្តិតយកសកម្មភាពអ្វីមួយ។ ជឿថាអ្នកគាំទ្រតិចណាស់ដែលបានដឹងអំពីអត្ថន័យនៅពីក្រោយស្ទាយអបអររបស់ខ្សែប្រយុទ្ធកូរ៉េខាងត្បូង។
បើតាមការឲ្យដឹងពីសាមីខ្លួន Son បង្ហើបប្រាប់ Sky Sports បែបនេះថា៖ “ប្រហែលជាង ១ ឆ្នាំមុន ខ្ញុំធ្លាប់បានគិតអំពីស្ទាយអបអរដ៏អស្ចារ្យមួយ ហើយខ្ញុំក៏រកនឹកឃើញស្ទាយមួយនោះ ដោយការអបអរជាទម្រង់រាងកាមេរ៉ា មានន័យថាវាជាការចងចាំដ៏ល្អមួយដែលគួរតែត្រូវបានថតទុក នៅពេលខ្ញុំរកបានគ្រាប់បាល់”។
លោកបន្ថែមទៀតថា៖ “វាដូចការដែលខ្ញុំផ្តិតយករូបភាពដ៏ល្អនៅពេលនោះ ទៅក្នុងការចងចាំរបស់ខ្ញុំ ហើយខ្ញុំមិនដឹងថាអ្នករាល់គ្នាអាចចាប់បានឬអត់ទេ តែខ្ញុំគិតថាវាជាការអបអរដ៏ពិសេសមួយ”។
បន្តសួរនាំថាហេតុអ្វីបានជា Son មិនចេះធ្លាក់ទឹកមុខ និងតែងតែញញឹម លោកក៏បន្ថែមថា៖ “នោះក៏ព្រោះតែខ្ញុំស្រលាញ់បាល់ទាត់ ហើយរីករាយនឹងការឈរជើង ក៏ដូចជាការលេងជាមួយក្រុមដ៏អស្ចារ្យ”។
គួរបញ្ជាក់ដែរថា Son Heung-min បានរួមរស់ជាមួយ Spurs អស់រយៈពេលជាង ៥ ឆ្នាំមកហើយ ដោយកុងត្រារបស់គេនៅសេសសល់ដល់ឆ្នាំ ២០២៣។ ជាមួយការបង្ហាញខ្លួន ២៦០ ប្រកួត Son រកបាន ១០១ គ្រាប់និង Assist ៥៧ លើក៕
ប្រភព៖ Goal