David Alaba នឹងត្រូវផុតកុងត្រាជាមួយក្លឹប Bayern Munich នៅបញ្ចប់ខែមិថុនា ឆ្នាំ ២០២១ នេះ ហើយតាមការលើកឡើងពីនាយកប្រតិបត្តិរបស់ក្លឹប លោក Karl-Heinz Rummenigge បានសង្កត់ធ្ងន់ថា ខ្សែការពារខ្លួននឹងប្រាកដជាចាកចេញពិតមែន។
កីឡាករអូទ្រីសមានភាគរយអាចនឹងផ្ទេរទៅចូលរួមនៅក្លឹប Liverpool, Real Madrid ឬ Chelsea ប៉ុន្តែថ្ងៃនេះលោក Rummenigge បាននិយាយដល់ក្លឹប Real Madrid ដែលបង្ហាញពីតម្រុយនៅភាគរយខ្ពស់ជាងគេ។
ប្រាប់សារព័ត៌មាន Sky Sports នាយកប្រតិបត្តិខាងលើនិយាយ៖ “ខ្ញុំច្បាស់ ៩៩,៩ ភាគរយ Alaba នឹងចាកចេញពីក្លឹបនៅបញ្ចប់រដូវកាល ដោយខ្ញុំសង្ឃឹមថាគេនឹងអាចនិយាយពាក្យលាជាមួយពានរង្វាន់បន្ថែមទៀតសម្រាប់ក្លឹប”។
លោកបន្ត៖ “David អាចចុះហត្ថលេខាសម្រាប់ក្លឹបនានាដែលគេចង់ទៅចូលរួម ខ្ញុំមិនច្បាស់ថាកិច្ចព្រមព្រៀងជាមួយ Real Madrid ជោគជ័យឬអត់ទេ តែនោះជាក្លឹបដ៏ល្អមួយ ហើយខ្ញុំយល់ថាវាក៏ជាការចាប់អារម្មណ៍សម្រាប់គេផងដែរ”៕
ប្រភព៖ Football-Espana