ក្លឹបបិសាចក្រហម Manchester United ត្រូវបានគេរាយការណ៍ថា នឹងបើកការចរចាជាមួយភាគីក្លឹប Barcelona សារជាថ្មី ជុំវិញការនាំយក Ousmane Dembele ប្រសិនណាពួកគេបរាជ័យលើការចរចាយក Jadon Sancho ចេញពីក្លឹប Borussia Dortmund។
នៅរយៈពេលចុងក្រោយ បិសាចក្រហមនៅតែត្រូវការកីឡាករមានគុណភាពច្បាស់លាស់មួយ នៅតំណែងស្លាបប្រយុទ្ធ ហើយមិនទាន់យកបាននរណាទាំងអស់ ស្របពេលដែលជាមួយ Sancho គឺចរចាមិនត្រូវថ្លៃ ព្រោះ Dortmund ទាមទារខ្ពស់ជ្រុលដល់ ១០៨ លានផោន។
បើតាមរបាយការណ៍ពីសារព័ត៌មាន Bild ចុះផ្សាយថា ក្រុមដឹកនាំដោយលោក Ole Gunnar Solskjaer នឹងបង្វែររ៉ាដាទៅចរចាយក Dembele ពីក្លឹបម្ចាស់ដី Camp Nou វិញនៅទីផ្សារដោះដូររដូវក្តៅខាងមុខ ហើយការចង់បាន Sancho គឺទំនងជានឹងបោះបង់ត្រឹមហ្នឹងហើយ។
គួរបញ្ជាក់ថា Dembele បច្ចុប្បន្នជាកីឡាករសកម្មមួយរូបរបស់លោក Ronald Koeman ដែលរដូវកាលនេះ បង្ហាញខ្លួន ២១ ប្រកួត រកបាន ៦ គ្រាប់និង Assist ៣ លើក ហើយ Sancho រកបាន ៦ គ្រាប់និង Assist ១៣ លើកនៅការបង្ហាញខ្លួន ២៣ ប្រកួត។
បញ្ជាក់ថា Dembele នៅសេសសល់កុងត្រាជាមួយអ្នកមានបុណ្យដល់ចុងខែមិថុនា ឆ្នាំ ២០២២ ហើយជាមួយហាងឆេងថ្លៃខ្លួនបច្ចុប្បន្ន កីឡាករបារាំងអាចមានតម្លៃខ្ទង់ ៥០ លានអឺរ៉ូ៕
ប្រភព៖ Sportsmole