ក្លឹបតោខៀវ Chelsea បានប្រកាសលើគេហទំព័រផ្លូវការនៅប៉ុន្មានម៉ោងមុននេះ ជុំវិញការចុះហត្ថលេខានាំយកអ្នកចាត់ការថ្មីគឺលោក Thomas Tuchel ជាមួយសុពលភាពកុងត្រារយៈពេល ១៨ ខែ។
ថ្លែងជុំវិញការឡើងកាន់តំណែងថ្មី លោក Tuchel មានប្រសាសន៍ថា៖ “ខ្ញុំពិតជាចង់អរគុណដល់ក្លឹប Chelsea FC សម្រាប់ទំនុកចិត្តរបស់ពួកគេមកលើខ្ញុំ និងលើបុគ្គលិករបស់ខ្ញុំ ដោយយើងរាល់គ្នាក៏មានការគោរពសម្រាប់អ្វីដែល Frank Lampard បានធ្វើនិងកេរឈ្មោះរបស់គាត់នៅ Chelsea កន្លងមកផងដែរ”។
លោកបន្ថែមទៀតថា៖ “ទន្ទឹមគ្នានេះ ខ្ញុំពិតជាមិនអាចរង់ចាំនៅការជួបជុំក្រុមថ្មីនិងការប្រកួតប្រជែងក្នុងលីគដ៏គួរឲ្យចាប់អារម្មណ៍មួយនេះទេ ខ្ញុំពិតជារីករាយក្នុងការក្លាយជាផ្នែកមួយនៃគ្រួសារ Chelsea”។
គួររំឭកថា Tuchel ធ្លាប់បានដឹកនាំក្លឹបនៅ Bundesliga ៧ រដូវកាល មាន Mainz ដែលធ្លាប់ជួយឲ្យក្រុមឡើងមកលេងនៅ UEL ហើយនៅ Dortmund ធ្លាប់ឈ្នះពាន German Cup។ រីឯនៅ PSG រដូវកាលចាស់ជួយក្រុមឡើងដល់វគ្គផ្តាច់ព្រ័ត្រ UCL ថែមទៀតផង។ ដោយឡែកជាមួយ Chelsea លោកមានកូនក្រុមចាស់ ២ រូបដូចជា Christian Pulisic និង Thiago Silva៕
ប្រភព៖ Chelsea