នៅការប្រកួតជុំទី ១៩ ក្នុងកីឡដ្ឋានរបស់ក្លឹប Elche កាលពីយប់មិញ Barcelona នៅតែធ្វើបានល្អ ដោយរកបាន ៣ ពិន្ទុតាមរយៈជ័យជម្នះ ២-០។
នេះជាការប្រកួតដែលអវត្តមាន Messi ក្រោយរងការព្យួរឈ្មោះ ពាក់ព័ន្ធនឹងការបង្កកំហុសនៅពានរង្វាន់ Spanish Super Cup ពេលកន្លងមក។ នៅតំបន់ប្រយុទ្ធទាំងបីខាងលើ Ronald Koeman បានប្រើប្រាស់ Braithwaite, Griezmann និង Dembele ប៉ុន្តែអ្នករកគ្រាប់បាល់ ជាកីឡាករនៅតំបន់បម្រើឯណោះទេ។
ទៅមើលការលេងរបស់ Barcelona យប់មិញ ស៊ីចង្វាក់គ្នាគួរសម ដោយគ្រប់គ្រងបាល់បាន ៦៦ ភាគរយ ស៊ុត ១៥ លើក ចំគោលដៅ ៨ លើក ធៀបនឹងក្រុមភ្ញៀវបានបាល់លេងតែ ៣៤ ភាគរយ ស៊ុតចំគោលដៅ ២ លើកគត់។ គ្រាប់បាល់ដំបូងធ្វើបានដោយកីឡាករ Frenkie de Jong មុនពេលកីឡាករបម្រុង Riqui Puig មកបន្ថែមនៅនាទី ៨៩ ជាគ្រាប់បាល់ចុងក្រោយ។
ទស្សនាវីដេអូខាងក្រោម៖
គួររំឭកថាបច្ចុប្បន្នអ្នកមានបុណ្យមាន ៣៧ ពិន្ទុឈរលេខ ៣ ធៀបនឹង ៤០ ពិន្ទុរបស់ Real Madrid និង ៤៧ ពិន្ទុរបស់ Atletico Madrid (តែសល់ ១ ប្រកួតក្នុងដៃ)៕