កីឡាករចំណូលថ្មី Donny van de Beek ត្រូវបានអ្នកចាត់ការលោក Ole Gunnar Solskjaer និយាយចំៗថាលោកហ៊ាននិយាយថាគេមិនសប្បាយចិត្តនឹងការដែលមិនសូវមានពេលវេលាលេង តែលោកលើកទឹកចិត្តឲ្យខិតខំបន្ត ព្រោះកាលសម័យលោកផ្ទេរមកជាកីឡាករដំបូងៗក៏ធ្លាប់ជួបរឿងអ៊ីចឹងដែរ។
ខ្សែបម្រើប្រយុទ្ធវ័យ ២៣ ឆ្នាំ ដែលផ្ទេរពី Ajax មក United កាលពីរដូវក្តៅ បង្ហាញខ្លួនសរុប ២១ ប្រកួត តែនៅ Premier League បានចូលរួមនៅជម្រើសដំបូងតែ ២ លើកប៉ុណ្ណោះ។ ស្ថានភាពជាក់ស្តែង Ole ក៏ពិបាកនឹងជ្រើសរើសដែរ ព្រោះមានជម្រើស Fred, Scott McTominay, Paul Pogba និង Bruno Fernandes។
យ៉ាងណាមិញលោក Ole និយាយថា៖ “ខ្ញុំមិននិយាយថា Donny គេរីករាយទេ ដោយការពិតទៅគេចង់លេងច្រើនជាងនេះ ប៉ុន្តែពេលនេះគឺមិនទាន់ដល់ពេល ដោយក្រុមយើងធ្វើបានល្អហើយ ក្នុងការកំណត់ថានរណាត្រូវលេងនៅតំណែងណាមួយ”។
លោកសង្កត់ធ្ងន់៖ “គេបានធ្វើឲ្យខ្ញុំនឹកដល់ខ្លួនឯង ពេលខ្ញុំមកដល់ដំបូង ក៏ខ្ញុំពិបាកនិងមានការប្រកួតប្រជែងអ៊ីចឹងដូចគ្នា ដោយពេលលោក Sir Alex មិនជ្រើសរើសខ្ញុំ ក៏ខ្ញុំនៅតែរីករាយព្រោះសំខាន់ក្រុមយើងឈ្នះ ហើយ Donny ក៏គេជាប្រភេទមនុស្សបែបហ្នឹងដែរ”៕
ប្រភព៖ Goal