Bettoni គ្រូជំនួយក្រុម Real Madrid ដែលដឹកនាំក្រុមប្រកួតយប់មិញនេះ បានអះអាងថាខ្សែប្រយុទ្ធ Eden Hazard ចាប់ផ្ដើមត្រលប់ទៅរកទម្រង់លេងល្អរបស់ខ្លួនវិញហើយ។
Hazard រកបាន១គ្រាប់ឱ្យក្រុម Real Madrid ក្នុងការប្រកួតទល់ក្រុម Alaves ជួយក្រុមឈ្នះក្នុងលទ្ធផល ៤-១។ នេះជាការរកគ្រាប់បាល់បានលើកដំបូងសម្រាប់ខ្សែប្រយុទ្ធបែលហ្សិកខាងលើនេះ ចាប់តាំងពីខែតុលាឆ្នាំ២០២០មក។ ហើយវាក៏ជាការប្រកួតមួយដែលរូបគេបានបង្ហាញទម្រង់លេងល្អផងដែរ។
ជាមួយគ្នានេះដែរ លោក Bettoni ដែលចូលខ្លួនដឹកនាំក្រុមជំនួសលោក Zidane បាននិយាយចំពោះទម្រង់លេងរបស់ Hazard ដែរថា៖ “Hazard កំពុងចាប់ផ្ដើមវិលទៅរកទម្រង់លេងល្អបំផុតរបស់គេវិញហើយ ប៉ុន្តែយើងក៏ត្រូវមើលថែគាត់ឱ្យបានល្អផងដែរ ការពារកុំឱ្យមានរបួសមកញាំញីបន្ថែមទៀត”៕ប្រភព Marca
