ជាមួយការប្រកួតនៅជុំទី ២៥ ក្នុងក្របខ័ណ្ឌ Scottish Premiership ក្រុមដឹកនាំដោយលោក Steven Gerrard គឺ Rangers នៅតែបន្តយកឈ្នះការប្រកួត ហើយរក្សាលទ្ធផលមិនទាន់ស្គាល់ពាក្យថា “ចាញ់” ប្រចាំរដូវកាល ២០២០/២១។
ដោយឡែកវាក៏ជាប្រកួតទី ១៥០ ផងដែរ សម្រាប់ការដឹកនាំរបស់អតីតកីឡាករនៅ Liverpool រូបនេះ ហើយបើមើលស្ថិតិជារួមវិញប្រាកដជាធ្វើឲ្យអ្នកលាន់មាត់ជាក់ជាមិនខាន។
Gerrard ដឹកនាំ Rangers ១៥០ ប្រកួត ទទួលបានជ័យជម្នះ ៩៨ ស្មើ ៣២ និងចាញ់តែ ២០ លើកប៉ុណ្ណោះ។ ក្នុងនោះកើតមានគ្រាប់បាល់ ៣២១ គ្រាប់ ហើយឲ្យគូប្រជែងស៊ុតចូលវិញត្រឹម ៩៩ គ្រាប់។
នេះអាចរាប់ថាជាស្ថិតិជោគជ័យយ៉ាងសម្បើមមួយរបស់គ្រូបទពិសោធន៍ថ្មីថ្មោង រហូតដល់មានមតិខ្លះទទូចចង់ឲ្យ Liverpool លៃលកយក Gerrard មកធ្វើជាជំនួយការគ្រូធំលោក Jurgen Klopp ទៀតផង។ មិនយូរមិនឆាប់ទេ យើងអាចនឹងឃើញវត្តមាន Gerrard មកដឹកនាំក្រុមធំណាមួយនៅ Premier League ជាក់ជាមិនខាន៕
ប្រភព៖ BR/Football