នៅការប្រកួតវគ្គ ៣២ ក្រុមចុងក្រោយកាលពីយប់មិញ ក្លឹប Real Madrid បានទទួលរងភាពអា.ម៉ាសសារជាថ្មីហើយ តាមរយៈបរាជ័យក្រោមថ្វីជើងរបស់ក្រុម Alcoyano ដែលជាក្រុមមកពីលីគលំដាប់ទី ៣ របស់អេស្ប៉ាញ។
វាជាការប្រកួតពានរង្វាន់ Copa del Rey ដែលក្រុមភ្ញៀវបានចាញ់ក្រោមលទ្ធផល ១-២ ដោយសារបាល់ថែមម៉ោង ១៥ នាទីពីរដង ស្របពេលនៅបញ្ចប់ ៩០ នាទីក្រុមទាំងពីរស្មើ ១-១។
បង្វែរទៅមើលស្ថិតិក្នុងការប្រកួត អាចថា Real ស៊យក៏បាន ដោយពួកគេមានឱកាសច្រើនដែរតែធ្វើមិនបានល្អ ជាមួយការស៊ុតចំគោលដៅដល់ទៅ ៧ លើក រកបានតែមួយគ្រាប់គត់ ខណៈក្រុមម្ចាស់ផ្ទះស៊ុតចំគោលដៅ ២ លើក ចូលទាំងពីរគ្រាប់។
គ្រាប់បាល់បើកឆាកដំបូងធ្វើបានដោយកីឡាករ Eder Militao ក្រោយការ Assist ចេញពី Marcelo នៅនាទី ៤៥ កៀកបញ្ចប់ការប្រកួត រហូតដល់នាទី ៨០ នៅតង់ទីពីរទើប Jose Solbes របស់ក្រុមម្ចាស់ផ្ទះមានឱកាសរកគ្រាប់បាល់តាមស្មើ។ លុះដល់បន្ថែម ១៥ នាទីពីរដង បើទោះបីជាកីឡាកររបស់ក្រុមម្ចាស់ផ្ទះរងពិន័យកាតក្រហមមួយក៏ដោយ ក៏ពួកគេនៅតែមានសំណាងអាចរកគ្រាប់បាល់ជ័យជម្នះនៅនាទី ១១៥ ធ្វើឲ្យ Real ចាញ់ទាំងមិនអស់ចិត្ត៕
ទស្សនាវីដេអូខាងក្រោម៖