ខ្សែបម្រើ Martin Odegaard បានស្នើសុំក្លឹប Real Madrid ដើម្បីចាកចេញហើយ ក្រោយពីរូបគេមិនមានឱកាសគ្រប់គ្រាន់ក្នុងការបង្ហាញសមត្ថភាពឡើយ។
លោក Zidane អ្នកចាត់ការក្រុម Real Madrid បានកោះហៅ Odegaard ត្រលប់មកវិញ ក្រោយពីរូបគេត្រូវបានក្លឹប Real Sociedad ខ្ចីជើងកាលពីរដូវកាលមុន។ ការហៅមកវិញនេះ ក្រោយពីមើលឃើញថាកីឡាករវ័យក្មេងរូបនេះលេងបានយ៉ាងល្អនៅតំបន់បម្រើ និងសក្ដិសមជាមួយទម្រង់លេងរបស់ក្រុមអធិរាជសវិញ។
តែការមកវិញលើកនេះ ហាក់ដូចជាមិនសមបំណងឡើយ។ Odegaard នៅតែមិនអាចស្វែងរកនាទីគ្រប់គ្រាន់សម្រាប់លេងបានដដែល។ ដោយភាគច្រើនរូបគេបានត្រឹមអង្គុយកៅអីបម្រុងប៉ុណ្ណោះ។ កត្ដាបែបនេះហើយ ទើបបានជាមានប្រភពនៅអេស្ប៉ាញបញ្ជាក់ថារូបគេបានស្នើក្លឹបដើម្បីចាកចេញហើយនៅខែមករានេះ ឬដាច់រដូវកាលនេះតែម្ដង៕
ប្រភព៖ Marca