ក្រុមតោខៀវ Chelsea បានបរាជ័យក្រោមថ្វីជើងក្រុម Leicester City ក្នុងលទ្ធផល ២-០ សម្រាប់ការប្រកួតពានរង្វាន់ Premier League នៅយប់មិញនេះ។
បរាជ័យនេះដែរ បានធ្វើឱ្យកៅអីរបស់លោក Lampard ក្នុងនាមជាអ្នកចាត់ការក្រុមចាប់ផ្ដើមក្ដៅឡើងហើយ ព្រោះពួកគេបានចំណាយប្រាក់ច្រើនណាស់កាលពីទីផ្សារដោះដូរកីឡាករកន្លងទៅ តែបែរជាមិនអាចទទួលបានលទ្ធផលល្អទៅវិញ។ ដោយបច្ចុប្បន្ននេះកាន់តែឃ្លាតឆ្ងាយពីការប្រជែងពានរង្វាន់ខ្លាំងទៅហើយ។
ចំពោះរឿងនេះដែរ Lampard អ្នកចាត់ការក្រុម Chelsea បាននិយាយថា៖ “ខ្ញុំដឹងថាខ្ញុំកំពុងមានសម្ពាធ។ ខ្ញុំចាប់យកការងារនេះ ខ្ញុំដឹងថានឹងមានពេលលំបាកច្រើន។ យើងស្ថិតនៅកន្លែងមួយដែលមិនទាន់អាចប្រជែងពានរង្វាន់បានទេ។ យើងទើបតែរួចពីការពិន័យ មានកីឡាករក្មេៗច្រើន ហើយកីឡាករថ្មីមកទៀតក៏ទើបបានលេងជាមួយគ្នា។ ពួកគេមិនទាន់លេងយល់ចិត្តគ្នានៅឡើយទេ”៕
ប្រភព៖ DailyMail