Mesut Ozil នឹងត្រូវបានប្រកាសជាកីឡាករថ្មីរបស់ក្លឹប Fenerbahce នៅឯប្រទេសទួរគីនៅពេលដ៏ខ្លីខាងមុខ បន្ទាប់ពីវត្តមានរបស់កីឡាករបានហោះទៅដល់ប្រទេសនោះនិងទទួលការស្វាគមន៍ពីមនុស្សជាច្រើនរួចទៅហើយ។
សម្រាប់ Ozil គេបានខកខានលេងឲ្យកាំភ្លើងធំតាំងពីខែមិនា ឆ្នាំ ២០២០ តែក៏នៅបន្តស៊ីថ្លៃពលកម្មខ្ពស់ដាច់គេប្រមាណ ៣៥០ ០០០ ផោន/សប្តាហ៍។ ដោយសាររងភាពរកាំរកូសដោះស្រាយមិនចេញ សាមីខ្លួនក៏សម្រេចចិត្តចាកចេញត្រឹមខែមករានេះ ដែលមុនកាលកំណត់ក្នុងកុងត្រារយៈពេលជាង ៥ ខែ។
យ៉ាងណាមិញកីឡាករវ័យ ៣២ ឆ្នាំក៏នៅតែទទួលបានការលើកទឹកចិត្តពីមិត្តរួមក្រុមនៅកីឡដ្ឋាន Emirate គឺ Shkodran Mustafi ដែលគេបានសរសេរនៅលើ Twitter បែបនេះថា៖ “អ្នកគឺជាកីឡាករដែលមិនអាត្មានិយមមិនថាតែក្នុងនិងក្រៅទីលាន ជាមនុស្សដែលខ្ញុំមិនធ្លាប់បានរួមបន្ទុកជាមួយកន្លងមក”។
លោកបន្ថែមទៀតថា៖ “អ្នកនឹងនៅតែត្រូវបានគេចងចាំជាស្តេច Assist បាល់ដ៏ល្អមួយ តែសោកស្តាយដែលក្នុងនាមយើងជាក្រុមតែមួយ យើងមិនអាចជួយអ្នកវិញបាននៅពេលដែលអ្នកត្រូវការពួកយើងបំផុត ជូនពរឲ្យជួបតែរឿងល្អ”៕
ប្រភព៖ Metro