ខ្សែបម្រើឆ្នើមរបស់ក្លឹប Manchester United គឺកីឡាករ Bruno Fernandes បានឈ្នះពានរង្វាន់កីឡាករល្អបំផុតប្រចាំខែនៅក្របខ័ណ្ឌ Premier League ចំនួន ៤ លើកហើយ បើរាប់ទាំងខែធ្នូចុងក្រោយទៀតនេះ។
ចាប់តាំងពីការផ្ទេរមកចូលរួមនៅខែមករា ឆ្នាំ ២០២០ កីឡាករព័រទុយហ្គាល់បាននាំផ្លែផ្កាជោគជ័យជាច្រើនឲ្យក្លឹប មិនថាតែការ Assist និងការរកគ្រាប់បាល់។ រាប់តែនៅក្របខ័ណ្ឌ Premier League ខ្សែបម្រើវ័យ ២៦ ឆ្នាំ រកបាន ១៩ គ្រាប់និង Assist ១៤ លើកនៅការបង្ហាញខ្លួន ៣១ ប្រកួត។
ដោយឡែកបើនិយាយពីចំនួនពានរង្វាន់កីឡាករល្អបំផុតប្រចាំខែឯណេះវិញ Bruno បានតាមស្មើកំណត់ត្រារបស់អតីតម្ចាស់អាវលេខ ៧ នៅ Old Trafford គឺ Cristiano Ronaldo បានហើយ ពោលគឺឈ្នះចំនួន ៤ លើក។ គេនៅចាញ់តែកីឡាករ ៥ រូបទៀតប៉ុណ្ណោះដោយរួមមានដូចជា៖
- Wayne Rooney (ក្លឹប Man Utd) និង Robin van Persie (ក្លឹប Arsenal/Man Utd) ឈ្នះ ៥ លើក
- Harry Kane (ក្លឹប Tottenham) និង Steven Gerrard (ក្លឹប Liverpool) ឈ្នះ ៦ លើក
- Sergio Aguero (ក្លឹប Man City) ឈ្នះ ៧ លើក៕
ប្រភព៖ SportBible