នៅថ្ងៃទី ២៤ មករា ឆ្នាំ ២០២១ អ្នកប្រដាល់ក្បាច់គុណចម្រុះ Conor McGregor នឹងត្រូវតតាំងគ្នាទល់ Dustin Poirier ដែលធ្វើឡើងនៅឯទីក្រុង Abu Dhabi ប្រទេសអារ៉ាប់រួម។
ប៉ុន្តែអ្វីដែលពិសេសនោះ ក៏ស្រាប់តែលឺតម្រុយមកថា McGregor អាចនឹងមានការប្រកួតធំមួយផ្សេងទៀតនៅកំឡុងពេល ៣ ទៅ ៥ ខែបន្ទាប់ ហើយទំនងជាប៉ះអ្នកប្រដាល់អាស៊ី Manny Pacquiao។
តាមការបង្ហើបពីគ្រូបង្វឹករបស់កីឡាករអៀរឡង់ លោក Phil Sutcliffe បាននិយាយថា៖ “៨៥ ទៅ ៩០ ភាគរយគឺអាចកើតឡើង នៅកំឡុងខែមិនា មេសា ឬក៏ឧសភា ដោយពេលនេះ McGregor គេត្រៀមខ្លួនរួចរាល់ហើយ ដោយក្រោយចប់ការប្រកួតគេក៏នឹងបន្តហ្វឹកហាត់ជាប់លាប់ដែរ”។
គួររំឭកថា McGregor ធ្លាប់ឡើងសង្វៀនប្រដាល់អាជីពតែមួយលើកគត់ ដោយកាលនោះនៅកម្មវិធី “The Money Fight” ដែលជាការជួបគ្នាទល់ Floyd Mayweather កាលពីខែសីហា ឆ្នាំ ២០១៧ ហើយលោកទទួលរងបរាជ័យនៅជុំទី ១០។
ស្របពេលដែល Pacquiao មិនធ្លាប់តតាំងអ្នកប្រដាល់ MMA ពីមុនមកនោះទេ ហើយលោកបានខកខានឡើងសង្វៀនប្រកួតតាំងពីថ្ងៃទី ២០ កក្កដា ឆ្នាំ ២០១៩ ដែលជាជ័យជម្នះលើកចុងក្រោយទល់អ្នកប្រដាល់អាមេរិក Keith Thurman៕
ប្រភព៖ GiveMeSport