នៅវេលាម៉ោង ២៣:៣០ នាទីយប់ថ្ងៃអាទិត្យ ក្រុមបិសាចក្រហម Man Utd នឹងត្រូវចូលជួបម្ចាស់ផ្ទះ Liverpool នៅឯកីឡដ្ឋាន Anfield ហើយក៏មានការផ្សាយផ្ទាល់នៅលើទំព័រ CTS Sports។
មុនរយៈពេលមួយថ្ងៃនៃការប្រកួត សម្រាប់ក្រុម Liverpool ក៏ទទួលបានដំណឹងថា អាចនឹងពន្លឿនល្បឿននៃការត្រលប់មកវិញរបស់ Joel Matip ហើយគេក៏ទំនងជាអាចនឹងជួយក្រុមនៅថ្ងៃនោះបានផងដែរ ខណៈបច្ចុប្បន្នគេបានវិលមកហ្វឹកហាត់វិញហើយ។
ខ្សែការពារវ័យ ២៩ ឆ្នាំបានខកខានការលេងរបស់ Liverpoool ៣ ប្រកួតចុងក្រោយ បន្ទាប់ពីជួបបញ្ហារបួស ដែលរុញឲ្យប្រព័ន្ធការពាររបស់ហង្សក្រហមចុះអន់ថយខ្លាំង ជាពិសេសនៅពេលដែលអវត្តមាន Van Dijk និង Gomez រយៈពេលយូរផងនោះ។
សម្រាប់ការត្រលប់មកវិញរបស់ Matip គេប្រហែលនឹងចាប់ដៃគូជាមួយ Fabinho នៅតំបន់ការពារកណ្តាល ឬអាចជាការសម្រេចផ្សេងទៀតពីសំណាក់អ្នកចាត់ការលោក Jurgen Klopp ព្រោះនៅតំណែងនោះ អាចមានជម្រើសរវាង Rhys Williams, Nat Phillips និង Jordan Henderson៕
ប្រភព៖ Sportsmole