ក្លឹប Real Madrid ត្រូវបានគេរាយការណ៍ថា កំពុងរៀបចំផែនការណ៍លក់ចេញកីឡាករមួយចំនួនក្នុងក្រុម ដើម្បីប៉ះប៉ូវប្រមូលថវិកាយកចរចាជាមួយក្លឹប Paris Saint-Germain លើការចង់បានកីឡាករ Kylian Mbappe។
តាមរបាយការណ៍ពី AS ចុះផ្សាយថា កីឡាករ ៣ រូបរួមមាន Gareth Bale, Luka Jovic និង Marcelo សុទ្ធសឹងតែត្រូវបានក្លឹប Madrid គិតរួចហើយស្រេច អំពីផែនការណ៍លក់ចេញក្នុងពេលខាងមុខ។
ក្លឹប Real Madrid ចង់ប្រមូលលុយឲ្យបាន ១៣៥ លានផោន ដើម្បីដាក់សំណើទៅ PSG លើការនាំយក Mbappe។ មួយផ្សេងទៀតក្លឹបក៏នឹងត្រៀមកញ្ចប់ថវិកាដើម្បីចំណាយលើថ្លៃពលកម្មប្រមាណ ១៩ លានផោន/រដូវកាលសម្រាប់កីឡាករបារាំងផងដែរ។
បញ្ជាក់ថា កុងត្រារបស់ខ្សែប្រយុទ្ធស្លាបខាងលើត្រូវផុតនៅខែមិថុនា ឆ្នាំ ២០២២ បែបនេះប្រសិន PSG ព្រមលក់នៅបញ្ចប់រដូវកាលនេះ ពួកគេអាចកើបលុយបានខ្លះ ស្របពេលដែលហាងឆេងថ្លៃខ្លួនរបស់ Mbappe គឺបានធ្លាក់ចុះមកក្រោម ១៥០ លានផោនហើយតាមរយៈការអាប់ដែតចុងក្រោយ៕
ប្រភព៖ SportBible