ក្លឹបបិសាចក្រហម Man Utd ទើបតែប្រកាសកាលពីពេលកន្លងទៅនេះ ជុំវិញការចុះហត្ថលេខានាំយកខ្សែប្រយុទ្ធស្លាបថ្មីមួយរូប នោះគឺ Amad Diallo ដែលជាកីឡាកររបស់ក្លឹប Atalanta ជាមួយតម្លៃផ្ទេរប្រមាណ ២១ លានអឺរ៉ូ។
យុវជនវ័យ ១៨ ឆ្នាំ ហាក់មិនទាន់ធ្វើឲ្យអ្នកគាំទ្រចាប់អារម្មណ៍ខ្លាំងនោះទេ ប៉ុន្តែតាមការជឿជាក់របស់លោក Rio Ferdinand បានសង្កត់ធ្ងន់ថា តាមមើលការលេងរបស់គេ គឺគេអាចនឹងធ្វើឲ្យគ្រប់គ្នាភ្ញាក់ផ្អើលដូចកាល United យក Ronaldo នៅឆ្នាំ ២០០៣ អ៊ីចឹង។
ប្រាប់នៅលើប៉ុស្តិ៍ Five YouTube លោក Ferdinand និយាយ៖ “យើង [ក្លឹប Man Utd] ទើបតែនាំយកក្មេងប្រុសមកពី Atalanta ហើយសង្ឃឹមថាគេអាចនឹងធ្វើអ្វីដ៏អស្ចារ្យមួយ ប្រសិនអ្នកមើលវីដេអូឃ្លីរបស់គេ ហើយនិយាយជាមួយមនុស្សនៅក្លឹបដែលពាក់ព័ន្ធនឹងការទិញយកគេ គឺប្រាកដជាលាន់មាត់ថា ក្មេងប្រុសម្នាក់នេះអាចក្លាយជាកីឡាករលំដាប់ពិភពលោក”។
លោកបន្ថែមទៀតថា៖ “ខ្ញុំមិនចង់ដាក់សម្ពាធរឿង Cristiano Ronaldo ទៅលើគេទេ តែគ្មាននរណាម្នាក់ដឹងទេ ដូចកាលសម័យ Ronaldo ពេលយើងទិញយកគេគឺគ្មាននរណាស្គាល់ឡើយ ហើយក្មេងប្រុសនេះគេស្រដៀងនឹងរឿងហ្នឹងអ៊ីចឹង”៕
ប្រភព៖ SportBible