ខ្សែបម្រើ Mesut Ozil កំពុងត្រៀមនឹងចាកចេញពីក្លឹប បើផ្អែកតាមដំណឹងចុងក្រោយ ហើយថ្ងៃនេះសាមីខ្លួនបានសារភាពចំៗហើយពីទ្រនំដែលអាចនឹងផ្ទេរចេញបន្ទាប់ពី Arsenal។
កីឡាករសញ្ជាតិអាល្លឺម៉ង់នៅសេសសល់កុងត្រាដល់ចុងខែមិថុនាឯណោះ ប៉ុន្តែតាមដឹងគេអាចនឹងដោះស្រាយចប់សព្វគ្រប់ជាមួយភាគីក្លឹបកាំភ្លើងធំ ហើយចាកចេញមុនអស់សុពលភាពកុងត្រា។
ជាមួយទ្រនំថ្មីនៅពេលបន្ទាប់ Ozil បង្ហើបថា គឺមានក្លឹបនៅអាមេរិកនិងនៅប្រទេសទួរគី។ អតីតកីឡាកររបស់ Real Madrid និយាយ៖ “មាន ២ ប្រទេសដែលខ្ញុំចង់លេងបាល់ទាត់មុនចូលនិវត្ត គឺទួរគីនិងអាមេរិក ប្រសិននៅទួរគីគឺខ្ញុំនឹងទៅលេងឲ្យក្លឹប Fenerbahce”។
គួររំឭកថា Ozil បានចាយពេលនៅទឹកដី Emirate Stadium ៧ ឆ្នាំមកហើយ ដោយចន្លោះពេលនោះគេរកបាន ៤៤ គ្រាប់និង Assist ៧៧ លើក ជាមួយការបង្ហាញខ្លួន ២៥៤ ប្រកួត៕ ប្រភព៖ Goal