បើនិយាយពីអ្នកគាំទ្រនៅក្នុងវិស័យប្រដាល់ពិភពលោក អ្នកប្រាកដជាស្គាល់ច្បាស់នៅអតីតអ្នកប្រដាល់លោក Mike Tyson។ បុរសសញ្ជាតិអាមេរិកធ្លាប់ល្បីល្បាញខ្លាំងក្នុងកំឡុងទសវត្សឆ្នាំ ៨០, ៩០ មុនលោកប្រកាសចូលនិវត្តនៅឆ្នាំ ២០០៥។
មុនបោះជំហានមកក្នុងអាជីពជាអ្នកប្រដាល់ផ្លូវការនៅអាយុ ១៨ ឆ្នាំ និង ២៤៩ ថ្ងៃ Tyson ក៏ធ្លាប់ហែលកាត់នូវការហ្វឹកហាត់ជាច្រើនលើកច្រើនសារ និងបទពិសោធន៍នៃការឡើងសង្វៀនតទល់គូប្រកួតជាច្រើនតាំងពីអាយុនៅជាង ១០ ឆ្នាំ។
បង្វែរទៅព្រឹត្តិការណ៍ Junior Olympics នៅឆ្នាំ ១៩៨១ កាលនោះ Mike Tyson បានធ្វើឲ្យអ្នកទស្សនាចាប់លាន់មាត់សរសើរជាបណ្តើរៗបាត់ទៅហើយ។ នោះក៏ដោយសារតែភាពរហ័ស និងការដាល់ចូលគោលដៅដ៏ច្បាស់លាស់បំផុតរបស់លោក។
ហើយមានប្រកួតមួយនោះ ពេលប៉ះ Joe Cortez, Tyson បានបង្កើតកំណត់ត្រាដ៏អស្ចារ្យមួយ គឺការផ្តួលគូប្រកួតឲ្យសន្លប់នៅជុំទី ១ ដោយប្រើថេរវេលាខ្លីបំផុតត្រឹមតែ ១០ វិនាទីប៉ុណ្ណោះ។ បុរសជាប់រហ័សនាម <<Iron Mike>> បានជ្រលរដាល់ចូលឆ្វេងស្តាំ ហើយមួយដៃចុងក្រោយពោរពេញដោយកម្លាំង ដល់ថ្នាក់ធ្វើឲ្យ Cortez ទប់លែងជាប់ និងត្រូវអាជ្ញាកណ្ដាលលើកដៃឲ្យគោះកណ្ដឹងបញ្ចប់ការប្រកួតភ្លាមៗ។
គួររំឭកថា Tyson បានឆ្លងកាត់ការប្រកួតលក្ខណៈអាជីពចំនួន ៥៨ លើក ឈ្នះ ៥០ ចាញ់ ៦ និងទុកជាមោឃៈ ២ លើក។ លោកបានជាប់ឈ្មោះជាអ្នកប្រដាល់ឈ្នះខ្សែក្រវាត់ WBC ទាំងស្ថិតនៅវ័យក្មេងបំផុត កាលនោះយកឈ្នះ Trevor Berbick នៅពេលមានអាយុ ២០ ឆ្នាំ និង ៤ ខែ៕
ប្រភព៖ GiveMeSport