Pep Guardiola បានដាក់គោលដៅកែប្រែប្រវត្តិសាស្ត្ររបស់ក្លឹប Manchester City ដោយត្រូវធ្វើយ៉ាងណាឱ្យឈ្នះក្លឹប Manchester United ឱ្យបាន។
ការដាក់គោលដៅនេះ គឺដើម្បីពង្រឹងសមត្ថភាពក្រុម ការពារតំណែងជើងឯកនារដូវកាលថ្មីនេះ។ ខណៈដែលមុនបើករដូវកាលលោកបញ្ជាក់ថាមានតែ៣ក្លឹបប៉ុណ្ណោះ មានឱកាសប្រជែងយកពានគឺ Man Utd , Chelsea និង Liverpool ។ អ្នកចាត់ក្រុម Man City រូបនេះ បាននិយាយថាគោលការណ៍ដឹកនាំក្រុមរបស់លោក គឺចង់ប្ដូរប្រវត្តិសាស្ត្ររបស់ក្លឹបនេះ កុំឱ្យដូចកាលពី១០ ឬ១៥ឆ្នាំមុន។
“យើងមានអ្នកជិតខាងដែល កាលពី១០ទៅ១៥ឆ្នាំមុន ពួកគេតែងតែឈ្នះរហូត។ ខ្ញុំគិតថា ការប្រកួតប្រជែងធំបំផុតរបស់ខ្ញុំក្នុងនាមជាអ្នកចាត់ការក្រុមគឺត្រូវផ្លាស់ប្ដូរអតីតកាលនេះ។ រដូវកាលដំបូងរបស់ខ្ញុំនៅទីនេះ គឺពិតជាឈឺចាប់ណាស់ យើងត្រូវផ្លាស់ប្ដូរអតីតកាល ដើម្បីឈានឡើងមួយកម្រិតទៀត”។ សម្ដីរបស់ Pep ។
ក្លឹប Manchester City ចាប់ផ្ដើមលេងល្អ បន្ទាប់ពីមានម្ចាស់ថ្មីជាមហាសេដ្ឋីទិញយក។ ក្រោយពីមានម្ចាស់ជាអ្នកមានមក ពួកគេបាននាំយកកីឡាករល្អៗជាច្រើន មករួមក្រុមរហូតមានឱកាសលើកពាន English Premier League និងជាក្រុមខ្លាំងមួយនៅអង់គ្លេសនាពេលបច្ចុប្បន្ននេះ៕ប្រភព៖ DailyMail