អ្នកចាត់ការក្លឹប Barcelona លោក Ronald Koeman បានបង្ហាញក្តីសង្ឃឹមថាក្លឹបអាចមានលទ្ធភាពនាំយកកីឡាករថ្មីចូលក្រុមនៅពាក់កណ្តាលរដូវកាល ក្នុងកំឡុងទីផ្សារដោះដូរនាខែ មករា ឆ្នាំ ២០២១។
ស្របពេលដែលកីឡាករជាច្រើនរងបញ្ហារបួស តួយ៉ាងមានដូចជា Ansu Fati, Gerard Pique និង Philippe Coutinho ហើយ Carles Alena ត្រូវអនុញ្ញាតឲ្យចាកចេញទៅចូលរួមនៅ Getafe ទៀតនោះ ក៏វាបង្កើតជាបញ្ហាមួយសម្រាប់ Koeman ក្នុងការដោះស្រាយប្រព័ន្ធលេងនៅពេលបច្ចុប្បន្ន។ ជាពិសេសគឺនៅតំបន់ប្រយុទ្ធ ដែលខ្វះខាតអ្នកបញ្ចប់ទីដ៏ល្អមួយជាចាំបាច់ ក្រោយពីបាត់បង់ Luis Suarez។
ប្រាប់សារព័ត៌មានកន្លងទៅនេះ Koeman មានប្រសាសន៍ថា៖ “ខ្ញុំយល់ពីស្ថានភាពរបស់ក្លឹប តែវាក៏សំខាន់សម្រាប់អនាគតរយៈពេលខ្លីរបស់យើងដែរ ដោយយើងចង់ពង្រឹងក្រុម ប៉ុន្តែបើវាមិនអាចធ្វើទៅបាន ក៏យើងមានតែរង់ចាំដល់ទីផ្សារដោះដូរលើកក្រោយទៀត”។
បញ្ជាក់ថា ក្រៅពី Alena កីឡាករមួយរូបផ្សេងទៀតរបស់ Barcelona គឺ Ilaix Moriba ក៏នឹងចាកចេញដូចគ្នានៅពេលខាងមុខ។ នេះបើតាមការបញ្ជាក់របស់អ្នកចាត់ការសញ្ជាតិហូឡង់ខាងលើ៕
ប្រភព៖ AF