អ្នកចាត់ការក្លឹបបិសាចក្រហម លោក Ole Gunnar Solskjaer បានទម្លាយជាផ្លូវការនូវព័ត៌មានត្រៀមចាកចេញរបស់កីឡាករ ២ រូប រួមមាន Marcos Rojo និង Sergio Romero ដែលកីឡាករអាហ្សង់ទីនទាំងពីររូបនេះ នឹងត្រូវចាកចេញនៅពេលខាងមុខ ក្រោយសម្រេចមិនមានការបន្តកុងត្រាថ្មីជាមួយក្លឹប។
សុពលភាពកុងត្រារបស់ពួកគេ គឺត្រូវផុតកំណត់នៅចុងខែមិថុនា ឆ្នាំ ២០២១ ហើយតាមដំណឹងចុងក្រោយសម្រាប់អ្នកចាំទី Romero អាចនឹងត្រូវផ្ទេរទៅក្លឹប Boca Junior។
យ៉ាងណាមិញតាមការបកស្រាយរបស់លោក Ole បាននិយាយកាលពីថ្ងៃសុក្រកន្លងទៅថា៖ “អ្នកទាំងពីរ [Rojo/Romero] គឺមានសុពលភាពកុងត្រាដល់រដូវក្តៅ តែពួកគេនឹងមិនមានការបន្តកុងត្រាថ្មីនោះទេ”។
លោកបន្ថែមទៀតថា៖ “យើងកំពុងអនុញ្ញាតឲ្យពួកគេស្វែងរកក្លឹបថ្មី ហើយកន្លងទៅ Marcos គេត្រូវបានក្លឹបផ្តល់ពេលវេលាឲ្យត្រលប់ទៅប្រទេសកំណើត អ៊ីចឹងពេលគេត្រលប់មកវិញក៏ត្រូវធ្វើចត្តាឡឺស័កមុននឹងបានចូលរួមការប្រកួតណាមួយ ដោយសម្រាប់អ្នកទាំងពីរគឺមានវិជ្ជាជីវៈគ្រប់គ្រាន់ ខិតខំប្រឹងប្រែង ហើយប្រសិនមានការស្នើចង់បានណាមួយពីក្លឹបដទៃ គឺយើងត្រៀមខ្លួនរួចរាល់ហើយ”៕
ប្រភព៖ Metro