ខ្សែការពារ Matthijs de Ligt ធ្វើតេស្ដវិជ្ជមានកូវីដ១៩ មិនអាចជួយក្រុម Juventus ប្រកួតជាមួយក្រុម Sassuolo បានទេ នៅចុងសប្ដាហ៍នេះ។
កីឡាករហុល្លង់ខាងលើនេះលេងពេញ៩០នាទីតែម្ដងឱ្យក្រុម Juventus យកឈ្នះលើក្រុម AC Milan កាលពីពាក់កណ្ដាលសប្ដាហ៍កន្លងទៅនេះ ប៉ុន្តែពេលនេះរូបគេត្រូវនៅដោយឡែកសិនទៅហើយ ក្រោយពីរកឃើញថាមានផ្ទុកកូវីដ១៩។ ដោយនេះជាកីឡាករទី៣ហើយរបស់ក្រុម Juventus ដែលរកឃើញថាមានឆ្លងមេរោគ ដោយកីឡាករ២នាក់ទៀតនោះគឺ Alex Sanndro និង Juan Cuadrado ។
នេះជាកង្វល់ធំមួយសម្រាប់ក្រុមរបស់លោក Pirlo ព្រោះថាកីឡាករដែលឆ្លងមេរោគនេះ សុទ្ធតែជាកីឡាករជម្រើសដំបូងក្នុងក្រុមស្រាប់ផងដែរ។ មួយវិញទៀត ការប្រកួតទល់ក្រុម Sassuolo នេះទៀតសោតមិនមែនជារឿងងាយស្រួលទេ ព្រោះក្រុមនេះកំពុងលេងបានយ៉ាងល្អ៕ប្រភព Dailymail