អតីតកីឡាករជើងចាស់នៅក្លឹប Liverpool គឺលោក Jamies Carragher បានជំរុញឲ្យក្រុមរបស់ខ្លួនគួរប្រញាប់គិតគូរដល់ការនាំយកខ្សែការពារកណ្តាលថ្មីនៅខែមករាមកចូលរួម មិនដូច្នោះទេក្តីសង្ឃឹមឈ្នះពាន Premier League រដូវកាល ២០២០/២១ គឺពិតជាមិនអាចកើតឡើងឡើយ។
បញ្ជាក់ថាក្រុមដឹកនាំដោយលោក Jurgen Klopp ទើបតែទទួលរងបរាជ័យទល់ Southampton ១-០ នាំឲ្យបាត់បង់ពិន្ទុ ហើយបើកភ្លើងខៀវឲ្យ United ឡើងមកប្រជែងនៅកំពូលតារាង។ ការបាត់បង់ខ្សែការពារកណ្តាល Virgil van Dijk ត្រូវបានគេយល់ឃើញថា ជាបញ្ហាដែលក្លឹបត្រូវប្រញាប់ដោះស្រាយ។
ប្រាប់ Sky Sports ក្រោយចប់ការប្រកួត លោក Carragher និយាយ៖ “ខ្ញុំមើលមិនឃើញថា Liverpool អាចឈ្នះពានលីគទេ ប្រសិនពួកគេមិនទិញខ្សែការពារកណ្តាល ដោយខ្ញុំបាននិយាយតាំងពីក្រោយការប្រកួត Everton ពេលដែល Van Dijk របួសម្ល៉េះ”។
លោកបន្ថែមទៀតថា៖ “ការដែលដាក់ឲ្យ Jordan Henderson លេងនៅតំណែងការពារកណ្តាល គឺវាមិនមែនជាតំណែងរបស់គេទេ បើទោះបីជាគេធ្វើបានល្អ ក៏ពិបាកដែរ ព្រោះមិនអាចបន្ថែមទំនុកចិត្តទៅតំបន់បម្រើខាងលើ”៕
ប្រភព៖ AF