អ្នកចាត់ការលោក Mauricio Pochettino បានទម្លាក់ចុងប៊ិចចុះហត្ថលេខាជាមួយក្លឹប Paris Saint-Germain កាលពីថ្ងៃទី ២ មករា ឆ្នាំ ២០២១ កន្លងទៅ ហើយកុងត្រារបស់លោកមានសុពលភាពផុតកំណត់ដល់ថ្ងៃទី ៣០ មិថុនា ឆ្នាំ ២០២២។
ជាមួយតំណែងថ្មីថ្មោងនៅក្លឹបសេដ្ឋីក្នុងប្រទេសបារាំងមួយនេះ តើអ្នកដឹងទេថា គ្រូបង្វឹកសញ្ជាតិអាហ្សង់ទីនអាចទទួលបានថ្លៃឈ្នួលប៉ុន្មានក្នុងមួយខែ?
លើកុងត្រារយៈពេល ១៨ ខែ សម្រាប់ Pochettino គឺអាចកើបបានថ្លៃឈ្នួលជាង ៥៨៣ ០០០ អឺរ៉ូ ឬជាង ៧១៣ ៩០០ ដុល្លារ/ខែ ហើយបើគិតជាឆ្នាំលោកទទួលបានខ្ទង់ ៧ លានអឺរ៉ូ។ ទំហំថ្លៃពលកម្មនេះគឺទាបជាងបន្តិចបើធៀបនឹងគ្រូចាស់លោក Thomas Tuchel ដែលទទួលបាន ៦២៥ ០០០ អឺរ៉ូ/ខែ ហើយ ៧,៥ លានអឺរ៉ូ/ឆ្នាំ។
ដោយឡែកបើធៀបនឹងបញ្ជីឈ្មោះអ្នកចាត់ការ ដែលទទួលបានប្រាក់ឈ្នួលខ្ពស់បំផុតក្នុងលោក គឺពុំមានឈ្មោះ Pochettino ស្ថិតក្នុងបញ្ជី Top 10 ឡើយ។ ខណៈដែលអ្នកចាត់ការឈរលេខរៀងទី ១០ គឺលោក Hansi Flick ក៏ដូចជាលោក Carlo Ancelotti ទទួលបាន ៨ លានអឺរ៉ូ/ឆ្នាំ ហើយអ្នកឈរចំណាត់ថ្នាក់កំពូលគឺលោក Pep Guardiola របស់ក្លឹប Manchester City រកបាន ២៣ លានអឺរ៉ូ/ឆ្នាំឯណោះ៕
ប្រភព៖ SportBible