មានសំណួរងឿងឆ្ងល់ជាច្រើនពីអ្នកគាំទ្រ ដែលបានចោទសួរមកកាន់ទំព័រ CTS Sports ជារឿយៗមិនថាតែក្នុងវិស័យកីឡាបាល់ទាត់ ប្រដាល់ឬក៏បាល់ទះជាដើម។ ក្នុងចំណោមនោះយើងបានធ្វើការជ្រើសរើសនូវប្រធានបទគួរឲ្យចាប់អារម្មណ៍មួយ ដោយបានចោទសួរថា តើគ្រូបង្វឹកឬក៏អ្នកចាត់ការ អាចមានសិទ្ធដឹកនាំក្លឹបបាល់ទាត់និងក្រុមជម្រើសជាតិព្រមគ្នាក្នុងពេលតែមួយបានដែរឬទេ?
ធ្លាប់ដឹកនាំក្លឹប CSKA Moscow និងជម្រើសជាតិរុស្ស៊ី
ចម្លើយយ៉ាងខ្លី៖ នោះគឺអាចធ្វើទៅបាន ហើយពុំមានច្បាប់ក្រមហាមឃាត់ណាមួយឡើយ ប៉ុន្តែវាស៊ីសងលើកុងត្រានៃភាគីក្លឹបឬក្រុមជម្រើសជាតិដែលគ្រូបង្វឹករូបនោះបានចុះហត្ថលេខា។ ជាក់ស្ដែងដូចនៅក្នុងកិច្ចកុងត្រាខ្លះ ពុំអនុញ្ញាតឲ្យអ្នកចាត់ការរូបនោះប្រើប្រាស់សិទ្ធទៅបម្រើការនៅស្ថាប័នដទៃឡើយ ហើយហេតុផលរួមគឺ ដោយសារកម្រមានអ្នកចាត់ការណាដែលអាចបំពេញកាតព្វកិច្ចល្អឥតខ្ចោះលើការងារ ២ កន្លែង ក្នុងពេលតែមួយខ្លាំងណាស់។
ជាឧទាហរណ៍ដូចជាលោក Guus Hiddink នៅកំឡុងឆ្នាំ ២០០៩ លោកកំពុងដឹកនាំក្រុមជម្រើសជាតិរុស្ស៊ី ហើយពេលនោះសមាគមបាល់ទាត់រុស្ស៊ីបានអនុញ្ញាតឲ្យលោកអាចទៅដឹកនាំក្លឹបបាល់ទាត់មួយផ្សេងទៀតបាន។ ដូច្នោះហើយអ្នកចាត់ការសញ្ជាតិហូឡង់ក៏ចាប់យកឱកាសទៅធ្វើជាគ្រូបង្វឹកបណ្ដោះអាសន្ននៅក្លឹប Chelsea ដែលមានន័យថា លោកកំពុងកាន់តួនាទី ២ ក្នុងពេលតែមួយ។
ជាលទ្ធផលលោកបរាជ័យការងារទាំង ២ កន្លែងនោះ ដោយនៅជម្រើសជាតិលោកមិនអាចដឹកនាំឲ្យក្រុមឆ្លងផុតវគ្គជម្រុះព្រឹត្តិការណ៍ World Cup ឡើយ ហើយនៅក្លឹប Chelsea ដឹកនាំបានតែ ២២ ប្រកួតក៏ត្រូវបានក្លឹបដកតំណែងចោលទៀត។ ប្រធានក្លឹបលោក Abramovich បាននិយាយកាលនោះថា៖ “ខ្ញុំមិនគិតថាវាអាចទៅរួចទេសម្រាប់អ្នកចាត់ការដែលអាចបម្រើការងារពីរនៅរដូវកាលតែមួយ ហើយធ្វើបានល្អទៀតនោះ ព្រោះជាអ្នកចាត់ការមិនស្រួលដូចកីឡាករដែលត្រឹមមកហ្វឹកហាត់ ២-៣ ម៉ោងហើយត្រលប់ទៅផ្ទះវិញទេ ពោលអ្នកចាត់ការត្រូវរៀបចំទាំងផែនការណ៍ផ្សេងៗ ហើយពិភាក្សាជាមួយក្រុមគ្រូពេទ្យអំពីកាយសម្បទាកីឡាករ និងវិភាគលើការប្រកួតចាស់ថ្មីថែមទៀត”។
យ៉ាងណាមិញក៏នៅតែមានបុគ្គលដែលអាចបំពេញការងារ ២ ក្នុងពេលតែមួយ ហើយបានលទ្ធផលល្អផងដែរ ជាក់ស្តែងដូចជាលោក Rinus Michels នៅឆ្នាំ ១៩៧៤ គ្រានោះលោកដឹកនាំក្លឹប Barcelona ផង និងក្រុមជម្រើសជាតិហូឡង់ផង។ ជាលទ្ធផលលោកដឹកនាំក្លឹបឈ្នះពាន La Liga ហើយនៅជម្រើសជាតិដឹកនាំក្រុមឲ្យឡើងដល់វគ្គផ្ដាច់ព្រ័ត្រ FIFA World Cup ថែមទៀត៕