លោក Ole អ្នកចាត់ការក្រុម Manchester United បានអះអាងថាបច្ចុប្បន្នក្រុមរបស់លោកមិនខ្លាចក្រុមណានោះទេ មកពីកន្លែងណាក៏បានដែរ ព្រោះពួកគេលេងយល់ចិត្តគ្នាបានល្អ។
ក្រោយពីទទួលបានជ័យជម្នះលើក្រុម Wolves ហើយ ក្រុមបិសាចក្រហមកំពុងឈរនៅចំណាត់ថ្នាក់លេខ២ក្នុងតារាង ដោយចាញ់ពិន្ទុក្រុមលេខ១ Liverpool ត្រឹមតែ២ពិន្ទុប៉ុណ្ណោះ។ ដោយសារតែហក់ឡើងបានដល់លេខ២ និងទម្រង់លេងក្រុមមានភាពល្អប្រសើរនេះហើយ ទើបបានជាលោក Ole អះអាងថាបិសាចក្រហមពេលនេះមិនចាំបាច់បារម្ភខ្លាចក្រុមណាមួយឡើយ។
លោក Ole បាននិយាយថាពីមួយប្រកួតទៅមួយប្រកួត Man Utd កាន់តែបង្ហាញពីទម្រង់លេងល្អ និងប្រសើរឡើងជាងមុន។ ជាក់ស្ដែងទាំងកាយសម្បទា និងការយល់ចិត្តគ្នាធ្វើឱ្យពួកគេក្លាយជាក្រុមមួយដែលអាចរកគ្រាប់បាល់បានគ្រប់ពេល ទោះជាវិនាទីចុងក្រោយក៏ដោយ។ ដូច្នេះហើយ ពេលនេះមិនចាំបាច់ខ្លាចក្រុមណាឡើយ ពោលគឺ Man Utd អាចលេងបានទាំងអស់៕
ប្រភព៖ DailyMail