លោក Zinedine Zidane បានបង្ហើបថាការងារជាអ្នកចាត់ការរបស់ខ្លួននឹងត្រលប់មកវិញនាពេលឆាប់ៗខាងមុខនេះ ហើយអាចនឹងចាប់ផ្ដើមនៅលីគរបស់អង់គ្លេស។
Zidane ក្រោយពីដឹកនាំក្រុម Real Madrid ជោគជ័យ៣ឆ្នាំជាប់គ្នាមក ក៏ប្រកាសលាឈប់ពីតំណែងអ្នកចាត់ការតែម្ដង ក្រោមហេតុផលចង់ឱ្យអ្នកថ្មីមកជំនួសកន្លែងរបស់ខ្លួន។ តាំងពីប្រកាសលាឈប់នោះមក បុរសសញ្ជាតិបារាំងរូបនេះ មិនទាន់សម្រេចចិត្តទៅដឹកនាំក្រុមណានៅឡើយទេ ដោយសាមីខ្លួនថាចង់សម្រាកជាមួយគ្រួសារសិន។
មិនទាន់បាន១ឆ្នាំផង ពេលនេះមានដំណឹងពីបារាំងមកថា Zidane អាចនឹងវិលចូលសមរភូមិបៃតងវិញហើយ ដោយអាចនឹងទៅដឹកនាំក្រុមបិសាចក្រហម Manchester United ប្រសិនបើក្លឹបនេះបណ្ដេញលោក Jose Mourinho ចោល។ ជាមួយដំណឹងនេះ គឺក្រោយពីលោក Jose កំពុងមានបញ្ហាក្នុងក្លឹប ដោយសារតែការទិញកីឡាករថ្មីមិនបាន ហើយ Pual Pogba ក៏ចង់ចាកចេញទៀត ព្រោះមានរឿងជាមួយអ្នកចាត់ការរូបនេះ។
យ៉ាងណាមិញ គេមិនទាន់ប្រាកដយ៉ាងណានោះទេ ព្រោះថារដូវកាលថ្មីនៅអង់គ្លេសបានបើកហើយកាលពីសប្ដាហ៍មុន ហើយបិសាចក្រហមក៏ទទួលបាន៣ពិន្ទុថែមទៀត ដោយយកឈ្នះលើក្រុម Leicester City ក្នុងលទ្ធផល ២-១៕ប្រភព.៖ JOE