នៅឯតារាង Western (AIA Stadium) កាលពីថ្ងៃអាទិត្យសប្តាហ៍មុន ក្រុមបាល់ទាត់ Cambodian Fan Club All Stars ឬហៅកាត់ CFA បានប្រមូលផ្តុំគ្នាទាំងឈុត A និង B បើកឆាកសម្ភោធឈុតថ្មីរដូវកាល ២០២១ និងប្រកួតកម្ដៅសាច់ដុំ។
ចំពោះឈុតថ្មីដែលមាន ៣ ពណ៌ដូចជា ស ក្រហម និងលឿង បានទទួលការឧបត្ថម្ភធំពីក្រុមហ៊ុនផ្ដល់ជូនសេវាកម្មកម្សាន្ត 2MBet ហើយឈុតដ៏ស្រស់ស្អាតទាំងនោះក៏ទទួលបានការចាប់អារម្មណ៍ខ្លាំងពីអ្នកគាំទ្រ ដោយលក់ដាច់បាន ២០០ ឈុតត្រឹមរយៈពេលតែជាងពីរថ្ងៃ។
បង្វែរទៅសកម្មភាពជួបជុំនៅថ្ងៃអាទិត្យនោះវិញ យើងក៏ប្រទះឃើញវត្តមានតារាសម្តែង ក៏ដូចជាតារាចម្រៀងល្បីឈ្មោះជាច្រើន ដែលសុទ្ធសឹងជាសមាជិកក្រុម មកចូលរួមសម្ភោធឈុត CFA រដូវកាលថ្មី រួមមានដូចជាលោក ម៉ៅ ហាជី, ដា ភ្លេង, ក្រុមតន្រ្តី Suffer Band និងលោក អ៊ុំ សុវណ្ណគិរី ជាដើម។
បើតាមការបញ្ជាក់ពីអ្នកតំណាងក្រុម CFA លោក អៃ សំអូនក៏បង្ហើបពីគម្រោងនៅឆ្នាំថ្មី ២០២១ បែបនេះថា៖ “CFA នឹងគ្រោងរៀបចំការងារសប្បុរសធម៌ខ្នាតធំមួយនៅរាជធានីភ្នំពេញផ្ទាល់ លើគោលដៅរៃអង្គាសថវិកាជួយដល់ជនខ្វះខាត លាយឡំនឹងការផ្សព្វផ្សាយពីការលេងកីឡាដើម្បីសុខភាព ក៏ដូចជាជៀសឆ្ងាយពីគ្រឿង.ញៀន មួយទៀតសោតក្នុងកម្មវិធីនោះក៏នឹងមានសិល្បករល្បីៗចូលរួមជាលក្ខណៈបែបប្រគំតន្ត្រីញាំងឲ្យកម្មវិធីកាន់តែសប្បាយរីករាយ”។
រំឭកថា CFA ជាក្រុមបាល់ទាត់ដែលមានអាយុកាលជាង ១ ឆ្នាំមកហើយ ដោយរយៈពេលកន្លងទៅនេះពួកគេបានចូលរួមក្នុងការងារសង្គមជាច្រើន ហើយក៏បានផ្តល់ឱកាសឲ្យយុវជនដែលមានទេពកោសល្យនិងឆន្ទៈខិតខំប្រឹងប្រែង អាចបង្ហាញសមត្ថភាពក្នុងវិស័យកីឡាបាល់ទាត់ផងដែរ ៕