អតីតកីឡាករនៅហង្សក្រហមគឺលោក John Aldridge បាននិយាយកាលពីពេលថ្មីៗនេះថា សកម្មភាពនៃការប៉ះទង្គិចរវាង Salah និង Ramos នៅវគ្គផ្តាច់ព្រ័ត្រ UCL ឆ្នាំ ២០១៨ គឺធ្វើឲ្យលោកគិតថាកីឡាករអេហ្សីបមិនគួរយក ក្លឹប Real Madrid ដាក់ក្នុងជម្រើសនៃការចាកចេញឡើយ។
បញ្ជាក់ថា Salah ធ្លាប់រងរបួសដៃធ្ងន់ធ្ងរ ក្រោយប៉ះទង្គិចជាមួយ Ramos នៅវគ្គផ្តាច់ព្រ័ត្រកាលពី ២ ឆ្នាំមុន។ ប្រាប់សារព័ត៌មាន Liverpool Echo លោក Aldridge និយាយថា៖ “ជាការយល់ឃើញផ្ទាល់ខ្លួន ខ្ញុំគិតថាក្រោយបទពិសោធន៍នៅ Champions League វគ្គផ្តាច់ព្រ័ត្រ និងការដែល Ramos ធ្វើដាក់គេ ប្រសិនខ្ញុំជា Salah គឺខ្ញុំស្អប់ Real Madrid ណាស់ហើយ”។
យ៉ាងណាមិញជុំវិញការចាកចេញរបស់ Salah លោកសង្កត់ធ្ងន់ថា៖ “ពេលនេះកីឡាករកំពុងមានឥទ្ធិពលខ្លាំងណាស់ អ៊ីចឹងបើគេចង់ចាកចេញ គឺគេនឹងចាកចេញទៅហើយ”។
បញ្ជាក់ថា ខ្សែប្រយុទ្ធវ័យ ២៨ ឆ្នាំរួមជើងនៅទឹកដី Anfield ជាង ៣ ឆ្នាំហើយ ដោយបង្ហាញខ្លួន ១៧៣ ប្រកួត រកបាន ១១០ គ្រាប់និង Assist ៤៥ លើក៕ ប្រភព៖ BeSoccer