ក្រុម Real Madrid បានយកឈ្នះលើក្រុម Granada ក្នុងលទ្ធផល ២-០ សម្រាប់ការប្រកួត La Liga នៅយប់មិញនេះ ដោយមិនបានដាក់ខ្សែប្រយុទ្ធ Eden Hazard ឱ្យចូលលេងនោះទេ។Hazard បានជាសះស្បើយនិងមានឈ្មោះក្នុងបញ្ជីដែរ សម្រាប់ការប្រកួតទល់ Granada នៅយប់មិញនេះ។
តែលោក Zidane មិនបានដាក់ឱ្យរូបគេចូលលេងនោះទេ ដោយបានត្រឹមមកអង្គុយកៅអីបម្រុងទាល់តែចប់ការប្រកួតតែម្ដង។ ចំពោះហេតុផលវិញ Zidane បាននិយាយថា៖ “យើងមិនអាចប្រថុយដាក់ឱ្យ Hazard លេងឡើយ។ គាត់ទើបជាពីរបួស ណាមួយប្រកួតនេះមានការប៉ះទង្គិចគ្នាច្រើនមែនទែន។ ខ្ញុំមិនចង់ប្រថុយឡើយ”។
រំលឹកថាទទួលបាន៣ពិន្ទុបន្ថែមនៅយប់មិញនេះបានធ្វើឱ្យក្រុម Real Madrid មានពិន្ទុស្មើជាមួយក្រុម Atletico Madrid ដែលឈរនៅកំពូលតារាងដែរ តែចាញ់គ្រាប់ចំណេញ។ មួយវិញទៀត AT Madrid ដែលឈរនៅលេខ១នោះ នៅសល់ការប្រកួតក្នុងដៃដល់ទៅ២ប្រកួតទៀតឯណោះ៕
ប្រភព៖ Goal